Jowai, Nailar 26
Ka Behdeinkhlam kaba shisien shisnem jong ka Seinraij Mukhla bad kaba khatduh eh ban pyndep na baroh ki Raid ha Rilum Jaiñtia, kala poi noh sha kaba kut ha ka 26 tarik Nailar ha pung aitnar hapdeng ka jingiphuh iphieng.
U MP ka Rajya Sabha, u James PK Sangma ula wan ban sakhi kum u kongsan ha ka jingdonlang u Myntri Sorkar bad MLA ka thaiñ Ma Wailadmiki Shylla, ki nongïalam Seinraij bapher bapher nalor ki hajar ngut ki paidbah.
U James PK Sangma ha ka jingkren u la ai ka jingkitbok kitrwiang ïa ki khun ki hajar ka seinraij Mukhla ba kin ïoh ïa ka met kaba koit ba khiah, ka rep ka riang kaba seisoh bad ka kamai kajih kaba dap ba biang.
Halor ka dorkhas ba ka aiti da ka Seinraij Mukhla na ka bynta ban pynbha pynmiat ïa ki sawdong sawkun ka Aitnar, na ka liang u MP u la pynbna ban ai jingïarap kumba 20 lak tyngka.
Katto katne ki jinglehniam mynta ka sngi, ki long ka jingkynting khnong Blai bad ka knia Khlam Ram Shyllang kaba la leh ha duwan knia kaba don hajan ka Law Kyntang ka shnong Mukhla, ka knia Ryngkaw bad ka Tyngkhain Khnong bad ïa kine ki khnong la wanrah sha Biar bud pat sa ka jingwanrah ïa ki rot sha ka Biar.
Ha ka nohphai sngi u Langdoh, u Sangot, ki maji, u chutia bad ki riew rangbah ki la ïakynduh ha madan Slot Masi bad la wanrah ruh shi jaka ïa ki Lai tylli ki rot ba la wanrah da ka Umlangchor, Neiñchnong bad Wahchnong ban pynhiar sha Aitnar.
Hashwa ban pynhiar ïa ki rot, la pynhiar shwa ïa ki 3 tylli ki Deiñkhlam ba la pynïeng hynnin ka sngi ha madan Tihkhyndaw bad hadien ba la pynhiar lut ïa ki deinkhlam la pynhiar sa ïa ki lai tylli ki rong ryngkat ka bom ka bhuri bad ka shad ka kmen.
Mynta u snem la don haduh 14 tylli ki rot kiba la wanrah sha ka Biar ryngkat ka jingshad kmen bad ka risa ka kynhoi bad hadien bala dep ban pynshad ïa ki rot la bret pat ïa ki kum ka dak ka jingpynkut ïa ka lehniam Behdeinkhlam.
