Shillong, Nailar 26
U Symbud Myntri Rangbah ba khmih ruh ïa ka tnad PWD (Roads) Bah Prestone Tynsong ha ka sngi Balang u la pyntip ba haduh 97% la dep ban pyntrei ïa ka surok Rongjeng-Mangsang-Adokgre (RMA) ba dang ïaid mynta hapoh ka Non-Lapsable Central Pool of Resources (NLCPR).
Haba jubab ïa ka jingkylli bala wanrah da u MLA ka Rongjeng Jim M Sangma halor ka jingslem ban pyntrei ïa kane ka projek ba kongsan kaba la mang naduh u 2017, u Bah Prestone u la ong, ka por ba buh ban pyndep ïa ka projek ka long 24 bnai hadien bala aiti ïa ka work order ba khatduh.
“Ka Sorkar kala rai ban kynthup ïa ka projek hapoh ka World Bank Project,” u la ong.
Haba jubab ïa ka jingkylli u Nongïalam ka Liang Pyrshah Mukul Sangma halor ka jingpynduna ïa ka mang tyngka, u Bah Prestone u la ong ba ïa ki jingpynkylla la leh da ka DoNER ministry.
U la pyntip ba haba sdang, ka mang tyngka bala buh da ka DoNER ka long T.210 klur kaba dei ban bei da ka Ministry bad ka NEC. Hynrei, ka jingai jingmynjur kine ki bor treikam kala wan tang T.123.28 klur.
“Na ka liang jong ngi, ka jingkylli kam mih satia ba ngi pynduna. Ka rai ka dei kaba shim da ka Ministry. Haba ngi ïoh ïa ka final AA, ka DPR kaba la pynkhreh haba sdang kaba long T.210 klur la hap ban pynthymmai katkum ka AA. Kam dei ka Sorkar ka pyntymmai dalade,” ong u Bah Prestone. Haba kylli halor ka jingïar ka surok bad ka DPR ba pynthymmai, u Bah Prestone u la ong ba kane ka projek ka dei ka surok intermediate lane ka jinglut ka long T.123.28 klur. U pynshai ba ka jingpynduna ha ka DPR haba ïadei bad ka jingjrong, ym ka jingïar, ka long na ka 28 Km sha ka 22 Km.
