Shillong, Nailar 26
Ka Meghalaya ka don ïa ka hok ban ong em ïa ka jingtih uranium haba ki jingma ïa ka mariang bad ïa ki briew ka long kaba jur bha, ong ka MLA ka Gambegre bad kurim u Myntri Rangbah ka Jylla, ka Mehtab Chandee A Sangma ha ka sngi Balang.
“U Uranium mynta u lah ban dei u mar ba kongsan na ka bynta ka Ri, hynrei ka Meghalaya ka don ïa la ka jong ka hok ban ong ‘Em’ ïa ki katto katne ki jingdon jingem bad ki dei ban ïai neh ïa ka jinglong bym pat don ba ktah, khamtam haba ki jingma ïa ka mariang jong ngi, ki shnong ki thaw bad ki pateng ban wan ka long kaba jur bha,” ong ka Mehtab haba kyrshan ïa ka resolution ka Sorkar pyrshah ïa ka jingtih uranium bala wanrah da u Myntri Rangbah ha ïingdorbar thawaiñ ha ka sngi Balang.
Ka la ong ba ka roi ka par ka dei ban pynthikna pat ïa ka jingïada ïa ka jingkhlain ba kongsan eh ka Jylla.
“Ka roi ka par ka dei ban pynthikna ba kan ïada ïa ki briew jong ngi, ïa ki wah jong ngi, ïa ki khlaw jong ngi bad kham kongsan eh, ïa ka khyndew jong ngi,” kala ong.
“Nga kmen ba ka ïingdorbar thawaiñ kala shim da kawei ka sur ïa ka rai ban mynjur ïa kane ka resolution,” ka la ong.
