Shillong, Nailar 26
U Myntri Rangbah ka Jylla, u Conrad K. Sangma ha ka Sngi Balang u la ong ba ka Kynhun Myntri ka la wanrah jingshai shuh-shuh halor ka jingpyntreikam bad ki jingpynshitom katkum ka Meghalaya Identification, Safety and Security of Migrant Workers Rules (MISSMWR).
U Sangma u la ong ba la kynthup lang ruh ïa ki jingpynsngew jong u Lat ka Jylla.
“Ka kyndon kaba thymmai ha kaba u Lat u la kdew ïa katto-katne ki jingpynsngew, ïa kita ki jingpynkylla mynta la kynthup lang. Ki dang don shuh sa katto-katne ki bynta haba ïadei bad ka jingshai haba phai sha ka jingbatai ïa ki ophisar bad ki rukom treikam. Ngi la ngam jylliew sha ki bynta jong ki ophisar kiba lah ban leh ïa ka jingjurip, kumno yn leh ïa ka jingjurip, ki bor ba ki don, kiei kiba ki lah ban leh,” u la ong hadien ka jingïalang jong ka Kynhun Myntri.
U la ong ba ki kyndon ba la pynkylla ki pynshai ruh ïa ki kuna, ka jingshah set patok bad ka jingpynshitom katkum ka aiñ.
“Yn ai jinghikai kaba donkam sha ki ophisar ki ban pyntreikam ïa kine,” la bynrap biang u Sangma.
Ka Kynhun Myntri ka la mynjur ruh ïa ki kyndon na ka bynta ka Meghalaya Flood Plain Zoning Act, 2026 bad ban pyntreikam ïa ka ain.
