Shillong, Nailar 26
U Bah Ardent Miller Basaiawmoit uba dei u MLA ka Nongkrem Konstitwensi bad ruh u President ka Voice of the People Party (VPP) u la kren shai lypa ba lada don kiba pyrshang ban tih ne khlong da ka bor ïa u marpoh khyndew Uranium, kan long nalor ka metïap jong u.
Ïa kane u Bah Ardent u la kren bad pynpaw haba ïashim bynta bad ai ka jingkyrshan ïa ka resolution kaba la wanrah da ka Sorkar Jylla lyngba u Myntri Rangbah ka Jylla u Conrad K Sangma ha ka sngi Balang hapoh ka ïingdorbar jong ka Dorbar Synrai ban pyrshah ïa ka jingkhlong ïa u uranium napoh ka jylla.
U Bah Ardent u la ai jingïaroh ïa ka Sorkar Jylla namar ka jingwanrah ïa ka resolution ban pyrshah tih uranium hapoh ka Jylla. Haba pynpaw ïa ka jingkyrshan ba pura ïa ka motion, u Bah Ardent u la kyntu ïa ki para nongthaw ain bad ki nongshong shnong ba kin phah ïa ka khubor kaba shai sha ka Jylla baroh kawei ba kin shim smai ha kaban khanglad shirta ïa ka Sorkar India ba kan tih uranium hapoh ka Jylla.
Haba kren bad pynpaw ka jingkyrshan ïa ka resolution jong ka Sorkar ban nym shah khlong ïa u uranium ba la wanrah u Myntri Rangbah, u la ong ba ki don ruh kiwei ki resolution kaba kum ka ïingdorbar ka la mynjur ha ki snem kiba la dep hynrei ki dang sah ha ka ban ai bor ïa ka Sorkar India ban pyntreikam kum ka resolution halor ka ILP.
U Bah Ardent u la kren ruh shaphang ka jingsngew syier ïoh don jingpyrshang ban khlong uranium da ka bor wat hapdeng ka resolution ba la mynjur, bad ong ban ïa bam smai ruh ban nym shah khlong bad lada don kiba pyrshang ban leh da ka bor kin ïoh ban leh kumta nalor ka metïap jong u.
“Ha kaba nyngkong, ngam shym la kren ne kynthoh eiei namar ngam da tip bha ne ban dei uta u riewshemphang halor kane ka bynta. Hynrei haba nga la leit hi dalade sha Jaduguda ban jurip bad jngoh, ha kaba nga la lap bad ïohi shisha ïa ka jingeh bad jingjynjar kaba kum ki paidbah ki mad na ka jingkhlong ïa u uranium,” la ong u Bah Ardent.
Haba pynpaw halor ka jingma ba ïoh ka Sorkar India kan wan thom da ka bor ban tih uranium, u Bah Ardent u la sei ruh lyngba ki kyndon ain ba kum ka Sorkar Jylla ka hap ban peitngor bad ruh ban thaw da kita ki ain kiba lah ban ïada kyrpang ïa ka hok jong ki paidbah hapoh ka jylla bad ruh ba ka Sorkar India kan nym lah ban tuklar haba la don ka ain kumba la pynkup burom da ka riti synshar ka ri.
