Shillong, Nailar 26
Ka Sorkar Pdeng ka dang peitngor ïa ka jinglong jingman kaba mih na ka jingshlei um ha Nepal. U Myntri Kam Pohïing jong ka Sorkar Pdeng u Amit Shah u la ïakren bad ki Myntri Rangbah ka Bihar bad Uttar Pradesh ha kaba ïadei bad ka jingjia lynshop ki bor ka mariang ha Nepal.
U Myntri Kam Pohïing ka Sorkar Pdeng ha ka post jong u ha ka ‘X’ u la ong, “Ka jingshah pynjulor ha ka jingshlei um ha Nepal ka long kaba sngewsih haduh katta katta. Ka jingsngewlem jong nga ka long bad ki longïing kiba la duh noh ïa kiba ieid ba thoiñ ha kane ka jingjia ba sngewsih. Ka Sorkar India ka don ryngkat bad ka Nepal ha kane ka por jong ka jingeh. Nga la ïakren bad ki Myntri Rangbah ka Bihar bad Uttar Pradesh ha kaba ïadei bad ka jingjia ha Nepal. Ha ki jaka khappud kiba lah ban shah ktah, la bthah ïa ki bor pynïaid shnong bad ki kynhun ai jingïarap, ryngkat bad ka National Disaster Response Force (NDRF), ba kin long kiba la pynkhreh.”
Katkum ka jingai jingmut jong ka Central Water Commission (CWC) bad ki kaiphod na ki lad pathai khubor, la ïathuh ba ka jingkiew kynsan ka um ha ka wah Trishuli ha Furke Khola ha Nepal, kaba jngai kumba 160 km na u pud u sam jong ka India, namar ka jingwan ka um saw/ki jingjia GLOF hajan khappud Nepal-China. Ka jingktah jong ka jingshlei um ka lah ban poi sha ki jaka kiba don sharum ha ka wah Gandak, ha India.
Ka Sorkar Kylla Bihar bad Uttar Pradesh ki la shim ïa ki sienjam kum ka jingpynkynriah ïa ki briew bad kiwei kiwei ki jingkyrshan ïa ki nongshong shnong jong ka India kiba don hajan khappud India-Nepal. La ai jingmut ïa baroh artylli ki jylla ba kin long kiba husiar bad ban peitngor ïa ka jinglong jingman.
Ki ophisar ka tnad kam pohïing ryngkat ka tnad kam bar ri (MEA), ka tnad Jal Shakti bad ka tnad ïada ri ki dang ïai buddien ïa kane ka jinglong jingman. Katkum ka CWC, ka jingdon jong ka um ha ki jaka buh um jong ka Nepal ka la nang hiar bad ka jinglong jingman ka don hapoh ka jingpeit bniah. Ym shym la don kano kano ka jingkulmar.
Ki la don ki khubor jong ka jingjah rngai ki nongjngohkai pyrthei na India ha Nepal bad ka MEA/Indian Embassy ha Kathmandu ka la ai ïa ki nombar na ka bynta ka jingïarap bad ki jingtip ha kaba ïadei bad ki nong India kiba la shah ktah ha ka jingshlei um ha Nepal. Ki briew kiba donkam jingïarap ki lah ban phone sha ka embassy ha u helpline number +977 985 131 6807 bad +977 970 910 7500.
