Shillong, Nailar 26
Ka Kynhun Myntri ka Jylla ha ka Sngi Balang ka la rai ban pynduh noh ïa ki ‘Interview’ na ka bynta ki kam ha ka ‘Group-C Non-Technical’ hapoh ki District Selection Committee (DSC) ka ban sdang naduh ka 1 tarik u Kyllalyngkot, 2027.
U Myntri Rangbah ka Jylla, u Conrad K. Sangma u la ong ba kane ka sienjam ka long shi bynta jong ka jingpynkylla ha ka thungkam-thungjam jong ka Sorkar kaba dang ïaid shakhmat.
“Ka dei ka jingbteng ïa ka jingpynïaid kam ha ka jingpynkylla kaba ngi la sdang. Hashuwa, katkum ki jingai jingmut jong ka UPSC bad ki jingpynkylla ka Commission jong ngi hi, ngi la pynsangeh noh ïa ki ‘Interview’ na ka bynta ki kam ha ka ‘Group-D’ ha ki DSC. Mynta ka sngi, ngi la weng shuh-shuh ïa ki ‘Interview’ na ka bynta ki kam ha ka ‘Group-C Non-Technical’,” la ong u Sangma hadien ka jingïalang ka Kynhun Myntri.
U la ong ba ki kam ‘Technical’ kiba hap hapoh ka ‘Group-C’ kin dang bteng ban don ïa ki ‘Interview’ bad ka tnad Personnel kan sa pyntip ïa ka thup jong ki kam ba la ñiew kum ki ‘Technical’ bad ‘Non-Technical’.
U Sangma u la ong ba ka Sorkar kan shim por lai ne saw bnai ban pynkylla ïa ki ‘Service Rule’ khnang ban pyntreikam ïa katei ka rai.
“Ki jingpynbna ki ban pynmih naduh ka 1 tarik u Kyllalyngkot, 2027 shaneng kin ym don shuh ïa ki ‘Interview’ na ka bynta ki kam ha ka ‘Group-C Non-Technical’,” u la ong.
Ka Kynhun Myntri ka la mynjur ruh ïa ka ‘Standard Operating Procedure’ (SOP) na ka bynta ki DSC ban pynbeit ryntih ïa ka rukom thungkam.
“Ki DSC ki treikam ha baroh ki distrik bad ki don bynta ha kiba bun ki kam, kumta teng-teng ïa ki rukom thung kam ba kongsan kim don. Ban lait na kane, ka Kynhun Myntri ka la mynjur ïa ka SOP ka ban bud da baroh ki DSC,” la ong u Sangma.
U la bynrap ba yn ai jinghikai ïa ki Deputy Commissioner bad kiwei-kiwei ki ophisar ba dei peit na ka bynta ban pyntreikam kloi ïa ka SOP, ïa kaba yn sa pynïar pat hadien sha kiwei pat ki ‘Recruitment Board’ kynthup ha ka liang ka jingsumar, ki kam pynroi nongkyndong bad pulit.
