Mairang, Nailar 26
U Superintendent of Police ka Eastern West Khasi Hills District ha ka jingpynlait khubor, u la pyntip paidbah ba ki pulit jong ka Eastern West Khasi Hills District ki la ïoh ïa ka rai jong ki lai tylli ki mukotduma ba kyrpang jong ka POCSO Act kiba hap hapoh ka jingkhmih jong ka thanad Mairang ha kaba ki la shah rai pynrem hakhmat ka ïingbishar jong ka Special Judge (POCSO) West Khasi Hills, Nongstoiñ.
Ha ka kyrwoh khubor, u SP u la ong ruh ba kawei na kine ka dei ka Mairang PS Case No. 13(03)2021 U/S 5j(ii)(I)/6 POCSO Act ïa kaba la tohkit bniah bha ha kaba la kem ïa u nongshah kynnoh u Wilphrest Mukhim bad la pynngat ïa u ha ka kyndon aiñ.
Shuh shuh u la ong ruh ba ka ïingbishar ka la rai pynrem ïa u da kaba un shah set phatok haduh 20 snem ha ryngkat ka kuna kaba 50,000 tyngka.
Nangta, kawei pat ka mukotduma No. 46(09)2023 U/S 3(a)/4 jong ka POCSO Act bad Sec 363 IPC ïa kaba la register case ha thanad Mairang, la tohkit bad pynngat mukotduma pyrshah ïa u nongshah kynnoh u Rickynelson Marwein ha kaba la kem bad phah ïa u sha ka judicial custody bad hadien ka jingbishar bniah, ka ïingbishar ka la rai pynrem ïa u da kaba set phatok kaba tyngeh haduh 20 snem ryngkat ka kuna kaba 50,000 tyngka kynthup ruh ka jingshah rai pynrem da kaba shah set phatok kaba 2 snem ryngkat ka kuna kaba 10,000 tyngka ki ban ïaid ryngkat ryngkat.
Ka kyrwoh khubor na u SP ka ong ruh ba ha kawei pat ka mukotduma No.24(08)2020 kaba la register hapoh ka Sec 5(j)(ii)(I)6 jong ka POCSO Act hapoh ka thanad Mairang hadien ka jingtohkit bniah bad charge-sheet la kem ïa u nongshah kynnoh u Brojester Lyngkhoi bad la phah ïa u sha judicial custody.
Shuh shuh u la ong ruh ba hadien ba la dep ban bishar, ka ïingbishar ka la rai pynrem ïa u ruh da kaba set phatok haduh 20 snem bad ka kuna kaba 50,000 tyngka pynbud pat sa ka jingshah set patok kaba 1 snem ryngkat ka kuna kaba 10,000 tyngka ki ban ïaid lang ryngkat ryngkat.
Ka khubor ka ong ruh ba kane ka jingshah rai pynrem jong kine ki lai tylli ki mukotduma ka pyni ïa ka jingshimkhia jong ki pulit jong ka Eastern West Khasi Hills District ban pynthikna ïa ka jingshngain jong ki khynnah bad ban pynngat ïa ki nongleh kam sniew ha ka kti jong ka ain bad ban pynïoh pat ïa kiba ngat ha ka lanot ïa ka hok jong ki.
