Shillong, Nailar 26
Haduh kumba shispah ngut eiei ki briew ki la ïap bad da ki spah ngut ki dang jah rngai ba kynthup ruh ïa 133 ngut ki nong India na ka jingshlei bad wan syllad kynsan jong ka Umsaw ha ka wah Bhote Koshi kaba la syllad naphang ïa ki shnong kiba don ha Nuwakot bad Dhading district.
Ka jingshlei um ka sdang na ki bynta khappud bad ka Tibet kaba la pynjot bad syllad naphang ïa ki katto katne ki shnong ha Nepal.
U Deputy Inspector General of Police Abinarayan Kafle u la ïathuh ha ki lad pathai khubor ba kiba bun kiba khlad ki dei ha Nepal bad katto katne ngut ha Tibet bad ha kaba la ïoh ban sei ïa ki metiap na Nuwakot bad Dhading district.
Ka tnad jngohkai ka Nepal ka ïathuh ba ki don kumba 384 ngut ki nongwan jngohkai ba kynthup 291 ngut ki ba nabar ri bad 93 ki nongshong shnong ka Nepal kiba la jah rngai na kane ka jingjia bad napdeng kine ki don 133 ngut ki nong India.
Ki bor Sorkar ki la ïathuh ruh ba kumba 26 ngut ki pulit ki la jah rngai ha Rasuwa District. Ka Armed Police Force ruh ka pyntip ba ki don 7 ngut ki pulit kiba jah rngai.
Ki shipai ka Nepal ki la leit da ki helicopter ban leit ai jingïarap sha ki jaka ba shah ktah.
Kane ka jingwan kynsan ka jingshlei um ka la syllad bad pynjot naphang ïa ki jingtei kum ki surok, ki jaka pynmih bording bad ki ïing ki sem, la pyndkut ïa ki byn tylli ki jingkieng bad kumba 6 tylli ki jaka sam bording ki la shah pynjot la ïathuh ka Nepal Electricity Authority kaba la pynthut ïa ka jingsam bording.
Ha kajuh ka por, u Myntri Rangbahduh ka Nepal, u Balendra Shah, u la khot ïa ka jingïalang bakyrkieh jong ka National Disaster Risk Reduction and Management Authority ban peit bniah ïa ka jinglong jingman.
U Myntri kam bar ri, u Shisir Kanal, u la ïathuh ha ki nongthaw ain, ba ka jingkhie jumai, ka la pynmih ïa ka jingtuid jong thah bad ki maw, kiba la pynlong ïa ka jingshlei um. Ka jingkhie jumai ka la jia ha ka por 8.37 baje mynstep bad, namar jong ka, ka la jia ka jingtwa khyndew kaba heh, kaba la khanglad ïa ka wah, kaba i kumba ka la pynlong ïa ka jingshlei um. Ka Geological Survey jong ka US, ka la register ïa ka jingkhynñiuh jumai kaba 4.4 magnitude ha katei ka thaiñ.
