Shillong, Nailar 26
U Myntri Rangbah ka Sorkar Jylla u Conrad K Sangma ha ka Sngi Balang u la ong ba baroh ki kam kiba ïadei bad ka Shree Cement Ltd la pynsangeh shuwa bad la thaw ïa ka Fact-Finding Committee ban pynlong ïa ka jingbishar ba bniah haba ïadei ki jingujor jong ki paidbah kiba la jia ha ka sngi ba pynlong ïa ka jingpynshai paidbah lane Public Hearing.
U Conrad u la pyntip ïa kane hadien ka jingïalang ba la long ha Secretariat bad ki nongïalam ka Khasi Students’ Union (KSU) ban ïakren halor ki san tylli ki mat jingdawa ba ka KSU ka la pynlong ruh ïa ka jingrah lama ïong ha ja 19 tarik u Nailar. Haba kren sha ki nongthoh khubor hadien ka jingïalang, Conrad u la ong ba ka Sorkar Jylla kan hap ban wad ki lad ki lynti ban ïoh ïa ka jingmang pisa na bynta ki kam pynroi bad ka Shree Cement ka dei kawei napdeng ki karkhana kaba heh tam ha ka ri.
U la ong ba ka jingpynlong ïa ka Public Hearing ka long kaba la ïaid katkum ki kyndon bad kdew ruh halor ka jingmih ki jingkynthoh, ka Sorkar ka la thaw ïa ka Fact Finding Committee (FFC) kaba laitluid bad ka ban khlieh da u heh Sorkar khlem da don kano-kano ka jingtuklar na kino-kino ki liang ha ka ba ïadei ban pynlong ïa ka jingwad bniah halor kane ka bynta.
“Ka KSU ka dawa ban pyndam noh ïa ka Public Hearing jong ka Shree Cement Ltd. Ngi la pyntip sha ki ba ka Sorkar ka hap ban wanrah ïa ka jingkynshew kam ki riew shimet na ka bynta ka jingkiew ka ïoh ka kot.” ong u Conrad.
“Ngin sa buh ïa ka Fact-Finding Committee ba laitluid ka ban khlieh da ki Heh Ophisar jong ka bor District. Tad haduh ba kan da pyndep ïa ka kam, ki kam baroh kin sangeh lut bad ym dei ban pynïaid ïa kano-kano ka kam” u la ong.
Haba ïadei ka MRSSA 2016 u Conrad u la ong ka jingpynrung kyrteng ïa ki briew kiba nabar lane kiba sahwai ka kiew bad kham bun ki shnong kiba la pdiang ïa ka, hynrei ka jingpynïar ïa ka rukom treikam ka long kaba suki namar kiba bun ki jingdonkam katto katne ki tiar ki tar. “Ngi don palat 6500 jan kot 7000 tylli ki shnong ha Jylla. Ban ai computer, ki Data Entry Operator ha man ki jaka ka dei ka kam kaba heh bha” u la ong haba pyntip ba ka Sorkar ka la shna mynta ïa ka Mobile App ban leh da ka Face Recognition ka ban pynsuk ïa kane ka kam.
U la ong ba kan long kaba suk bha ïa ki khlieh nongsynshar lada lah ban ïoh ïa ka ha kano-kano ka mobile na ka bynta ban Scan ïa ka dur khmat, ïa ki kot ki sla bad ban buh ha ka jaka buh jingtip ba pdeng kan ïarap ban pynsuk bad ban stet ha kaba ïadei ka jingpynrung kyrteng.
Haba ïadei ka Facilitation Centre, u Conrad u la kam ba ka la don ka jingsngewthuh bakla halor ka jingong ba la tei ïa ka Food Court lane ka jaka bam, “Kan don ka jaka bam (Food Court) ruh hynrei ka bynta kaba nyngkong kan long ka Felicitation Centre. Mynshwa ka long 300 sq ft, mynta ka long 1000 sq ft ryngkat bad ka jingpynheh shuh-shuh sha ka 2000 sq ft,” u la ong bad la bynrap ba ka jingjurip kan long lang bad ki dkhot ka KSU.
U la ong ba ka jingtei ïa ki Felicitation Centre ki dei ban dep hapoh 2-3 bnai bad ka Umling Centre ka dei ban treikam shwa ka Khrismas. Ka jaka na ka bynta ka Ratacherra bad ka Athiabari dang hap ban thied jaka.
Halor ka Meghalaya Identification, Registration, Safety bad Security jong ka Migrants Workers Act 2020, (Halor ka jingithuh, ka jingpynrung kyrteng, ka jingïada ïa ka Migrants Workers Act 2020), u Conrad u la ong ba ki kyndon kiba mynshwa kim pat shai bha, ba ki ophisar kin lah ban peit lane ba ki pulit ki lah ban pynshisha.
“Ngi la pynshai ba kin don ar tylli ki lad ban pynshisha u SP jong ka Distrik trai ri lane lyngba ka CCTNS Network. Hadien ka jinghikai kaba shibnai, ka jingpynmih ïa ki kan sa long” u la ong.
Haba ïadei ka NEIGRIHMS, u la ong ba ka dei ka jaka pule kaba laitluid, hynrei ka Sorkar kan pynsuk ïa ka jingïakynduh jong ka KSU bad u Myntri ka koit ka khiah jong ka Sorkar Pdeng ha kaba kan ai ruh ïa ka jingkyrshan na ka bynta ki eksamin.
Halor ki jingpynkylla ha ka jingthungkam ha ka Jylla, “Na ka bynta ka Group-D la dep pynduh noh ïa ka Personal Interview kumjuh na ka bynta ki kam kiba hap ha ka Non-technical Group-C ruh yn pynduh noh ïa ka Personal Interview naduh u bnai Kyllalyngkot 2027. La pyndam noh ïa ki SOP na ka bynta ki DSC” la ong Conrad.
“Na ki 23 tylli ki jingpynkylla ba la ai jingmut na ka bynta ka MPSC, 19 tylli la pyntreikam, u la ong bad la bynrap ba ïa ka jingdawa ban buh kyrpang ïa ki kam MPSC tang na ka bynta ki nongshong shnong yn sa eksamin da u Symbud Myntri Rangbah u Bah Prestone Tynsong ha ka taïew ban wan bad ban wad bha ïa ka nongrim kaba katkum ka aiñ.
U CM u la ong ba ka KSU ka la ai 20 tylli ki mat jingdawa bad san tylli la ïakren ha ka sngi Balang, bad ka jingïakren kan bteng na ka bynta ki mat kiba dang sah.
