Shillong Nailar 26
Ka Hynniewtrep Youth Council (HYC) ha ka sngi Balang ka la leit ban ujor ejahar ha ophis jong u Superintendent of Police (SP) ka East Khasi Hills pyrshah ïa ar ngut ki briew kiba na Assam kiba la kynthoh da ki kyntien bym ïahap pyrshah ïa ki longkmie bad ki samla kynthei ka jaidbynriew.
Kine ki arngut kiba ka HYC ka la ujor ejahar ka long pyrshah ïa uwei u ba na Hojai District ka Jylla Assam uba pyndonkam ïa ka ‘Facebook Account’ kaba la ai kyrteng ‘Moskan Uddin’ bad uwei pat uba la ai kyrteng ‘Mumu Mumu’ ba na Galaghat, Merapani, Assam.
U Bah Enlang Sawian Secretary Education Cell HYC u la ong ba kine ki briew ki la kren ïa ki kyntien ki bym lah ban pdiang ha kaba ki kynthoh ïa ki longkmie bad ki samla kynthei jong ka Jylla da kaba kynnoh ba ‘ki kynthei ka jaidbynriew ki dei kiba don bynta ha ka kam khaïi met’.
“Ngim lah ban pdiang ba da ki briew kiba nabar kin wan ban kren jot ïa ki longkmie ki samla kynthei ka jaidbynriew” ula ong.
Shuh-shuh u la ïathuh ba ka jingujor FIR ka HYC ïa kitei ki arngut ki briew ka dei beit halor ki durkhih (Video) ba la saphriang ba kitei ki arngut ki briew ki la kren ïa ki kyntien ba kum ka jaitbynriew kam lah ban pdiang.
U la kyntu ba ka Police Department ba ka dei ban thwet bad ban kem ïa kitei ki briew kiba donkti ha ka ban pynbudnam ïa ka jaidbynriew bad bynrap ba lada ka tnad pulit kam leh eiei ka HYC ka la byrngem ba kan sa shim da kiwei ki sienjam ban pynthikna ba kum kitei ki jaid briew kin ngat ha ki jingpynshitom ki bor jong ka aiñ.
