Nongstoiñ, Nailar 26
Kawei ka kali Hyundai i10 kaba don ïa u number AS01-DH-7347 kaba la ïathuh ba ka dei jong u pulit Assam uba don ha Mawsikar Assam Police Camp jong ka thaiñ Langpih ka la ingkhong khait hadien ka jingkem ding kaba la bam duh ïa katei ka kali.
Haba pynthikna ïa kane, u Superintendent of Police (SP) ka West Khasi Hills Bah Herbert P Kharkongor u la ong, kane ka jingjia kala paw pyrthei ha ka por kumba 7 baje eiei mynstep jong ka 26 tarik u Nailar, hadien ba ki pulit ka Langpih Border Outpost (BOP) kila ïoh pdiang ïa ka jiingpyntip na u rangbah ka shnong Mawsikar ha kaba ïadei bad katei ka jingjia pluh kali. Shuh shuh u la ïathuh ruh ba hadien katei ka jingtip, ki pulit ka Langpih BOP ki la pynlong ïa ka jingtohkit bad leit jngoh ïa katei ka kali ha katei ka jaka bala jia ha ryngkat ka jingïadonlang ruh u Sordar bad Secretary ka shnong lem bad kiwei ki riew rangbah ka shnong.
Ka khubor na u SP ka ong ruh ba katkum ka jinglap la ïathuh ba ïa katei ka kali la pynïeng harud surok ha Mawsikar, kaba jngai tang katto katne meter na ka ktem jong ki Pulit ka Assam bad la suba ruh ba katei ka jingpluh ding kala jia ha ka por kumba 4 baje eiei mynstep, watla ym pat lah ban tip ïa ka daw bad ki jingjia kiba la pynlong ïa katei ka kali ba kan pluh.
Shuh shuh la ong ruh ba la pynlong ïa ka jingpeit bniah ïa katei ka jaka hynrei la ong ba ym shym la lap ïa kino kino ki tiar kiba pynsuba kiba lah ban pyni ïa ka daw jong ka jingpluh jong kane ka kali bad na ka liang jong ki pulit ka Assam ruh kila leh ïa kaba donkam na ka liang jong ki ha kaba ïadei bad kane ka jingjia.
U la ong ruh ba haduh ba phah ïa kane ka kyrwoh khubor ym shym la ïoh jingujor ejahar eiei na u trai kali ha Langpih BOP bad ki pulit kila ong ruh ba ka jinglong jingman baroh kawei ha katei ka jaka ka long kaba shngaiñ.
