Shillong, Nailar 27
Ki pulit ka East Khasi Hills District ha ka janmiet jong ka 27 tarik u Nailar 2026, ki la rah ïa u Samla Jeremaiah Pohtmi, Assistant Organizing Secretary ka Khasi Students’ Union (KSU) sengkmie sha Ïingkashari District and Session Court ban tian bishar.
Ïa u Samla Jeremaiah Pohtmi, ki pulit ki la kem noh hadien ba la mih ka huri hura ha ka sngi ïaid rally arshaka, ba la pynlong da ka Khasi Students’ Union (KSU), kaba la don ki riew shimkabu ban pynpait pynpra ïa ki kali Assam bad ka jingshah shoh ki bar jylla, kaba la jia myn ha ka 19 tarik u Nailar 2026.
Ha kane ka sngi ba shah rah sha Ïingkashari ïa utei u Samla, la wan ban synranlang da ki bahaïing hasem bad kumjuh ruh da ki dkhot ka KSU.
Ka Ïingkashari ka la ai por 14 sngi ban tohkit hapoh ka Judicial Custody ïa u Samla Jeremaiah Pohtmi.
Lah ban kdew ba katei ka rally kadei kaba la ai jingbit da ki bor district, ha ryngkat bad ki kyndon ba kadei ban long kaba jai-jai, hynrei hapdeng ka rally ka la mih ka jingjia shah pynpait ki kali na Assam, ka jingthang ki kali Sorkar, ka jingshoh pynmynsaw ïa ki briew.
