Shillong, Nailar 27
Ka ïingbishar ha East Khasi Hills ka la hukum set phatok 5 snem ïa uwei u briew halor ka jingdonkti ba u dung da ka tari ïa uwei u briew ha Sohra ha u snem 2023.
Ka ïingbishar jong u Additional Deputy Commissioner (Judicial) ka la rai pynrem ïa u Stephan Khongtim ha ka Sessions Case No. 19(T)2023 halor ka pyrshang ban pynïap bad pynmynsaw briew.
U Khongtim u la shah rai set phatok 5 snem bad ka kuna kaba T.20,000 katkum ka kyndon 307 IPC, bad 2 snem bad ka kuna T.5,000 katkum ka kyndon 326 IPC.
Lada ym lah ban siew, un hap shong phatok sa 2 bnai bad 1 bnai. Kane ka mukotduma ka dei jong ka thanad Sohra Case No. 8(03)2023.
Katkum ka jingong ki pulit, ka FIR ba la ujor ha ka 21 tarik Lber, 2023, ka ïathuh ba u Stephan u la dung ïa u nongujor na ka bynta ka kpoh ha ka 24 tarik Rymphang 2023. La kem ïa u bad la charge-sheeted ha ka 28 tarik Ïaïong, 2023.
U SP ka East Khasi Hills Bah Vivek Syiem, ha ka kyrwoh ba la pyllait, u la ong ba une u nongshah rai pynrem u la dep pynlut 2 snem 5 bnai bad 16 sngi hapoh phatok bad mynta un shah set sa 2 snem 1 bnai bad 20 sngi.
Ïa kane ka kam la tohkit da u SI Habanjop Khonglah, uba don mynta ha thanad Mawshynrut ha West Khasi Hills.
