Jowai, Nailar 27
Ki trai jaka bad ki nongrep na Shnongrim kiba shah ktah na ka mining ha Lum Syrman, Elaka Nongkhlieh, ki pynpaw ka jingsngewnguh bad ai khublei kyrpang ïa ka Khasi Students’ Union (KSU) halor ka jingïeng skhem ban pynsngew ïa ka jingeh jong ki bad ban dawa ïa ka hok jong ki briew kiba shah ktah ha ka Shree Cement project.
“Ngi sngewnguh ïa ka KSU namar ka la pynlong ïa kane ka mat ban poi sha ka Sorkar bad ban pynbor ïa ka Sorkar ban peit bniah ïa ki jingeh kiba mih halor ka Public Hearing jong ka 31 tarik Naitung 2026”, la ong ka kyrwoh na ki trai jaka bad nongrep.
Ka Sorkar mynta ka la rai ban thung ïa ka Independent Fact-Finding Committee ban tohkit ïa ka rukom pynlong ïa ka Public Hearing, ka jingïashim bynta ki kynhun bad ki mat kiba ïadei bad ka mariang. Ka Sorkar ka la rai ruh ban pynsangeh ïa ki kam jong ka Shree Cement haduh ba ka committee kan pyndep ïa ka jingtohkit.
Ki la ong ba ki kwah ban pynpaw shai ba kane kam dei ban long ka jingkut jong ka mat. Ka jingeh kaba kongsan jong ki trai jaka na Lum Syrman ka dang sah ka jingdawa ban pynbeit shwa ïa ka jinglong trai bad ka hok halor ki jaka shuwa ban bteng ïa kino-kino ki kam kiba ïadei bad ka project.
Shuh-shuh ki la ong ba naduh ba sdang, ki trai jaka ki la dawa ba dei ban pynbeit shwa ïa ki jaka bad ki hok jong ki trai jaka khnang ba yn ym mih ki jingïakajia, ki jingïapher jingmut bad ki jingjia kiba sngewsih ha ka lawei. Ka jingbym sngap ïa ka jingud bad ka jingkyrpad jong ki briew kiba shah ktah ka lah ban wanrah ïa ka jingbym shongsuk shongsaiñ ha ka imlang sahlang.
Ki la dawa ba ka Fact-Finding Committee kan long kaba shisha bad kaba laitluid, bad ba ki trai jaka bad ki nongrep na Lum Syrman kin ïoh ïa ka lad ban pynsngew ïa ka jingshisha bad ki jingeh jong ki. Ka jingtohkit ka dei ban kynthup ïa kaei kaba la jia ha ka sngi jong ka Public Hearing, kynthup ruh ïa ka jingkhanglad ïa ki trai jaka ban poi sha ka jaka long hearing.
Ki trai jaka bad nongrep ki dawa ban pynbeit shwa ïa ka hok jong ki trai jaka. Pynbeit ïa ki jingeh shuwa ban bteng ïa ka project bad burom ïa ka hok jong ki trai jaka.
