Shillong, Nailar 27
U Myntri ka tnad Pule Puthi ka Jylla Bah Lahkmen Rymbui ha ka sngi Palei u la ther tyngeh ïa ki nongkynthoh kiba buh jingkylli ïa ka jingkiew jong ka jingpass ha ka eksamin SSLC na ka 50% sha ka 96% hadien ba pyntreikam ïa ka CM IMPACT.
Haba jubab ïa ka jingïatai kaba lyngkot (short duration discussion) kaba la wanrah da u MLA ka UDP na West Shillong, u Bah Lah-kmen u la ong ba ka Sorkar kam dei ban shah kynnoh ba ka ïarap ïa ki khynnah ban pass.
“Balei phi sngewsih haba ki khynnah ki pass? Kaei ka jingbitar kaba phi don pyrshah ïa ki? Hato phi kwah ba kin fail?” la kylli u Myntri.
U la ïasaid nia ba katba ki samla pule ha sor ki lah ban siew ïa ka bai leit khreh kot (tuition), ki khynnah kiba duk bad na nongkyndong ki donkam ïa ka jingkyrshan jong ka Sorkar.
“Man la ki jaka die kot ki die ïa ki kot jingïarap ba la pynmih da ki kompeni shimet. Hato ki khynnah pule jong ka Meghalaya kim don hok ban ïoh jingïarap? Lada ki fail shisnem, ki pep skul noh. Hato ngin kmen lada kiew ka jingpep skul shiteng? Mynta ka jingpep skul shiteng por ka la hiar sha ka 6.2% bad baroh ki sngewsih ïa kane,” u la ong.
U Myntri u la ong ba ka jingpynbha ïa ki risol ka buh ïa ka jingeh ha ka liang ka pisa tyngka ïa ka Sorkar namar ba ka hap ban kyntiew ïa ki skul Secondary bad plie ïa ki skul Higher Secondary bad ki College..
“Ka Sorkar kan leh katba lah na ka liang jong ka, ban ai ïa ka pule dangle kaba bha tam bad ka jinglah ban ïoh da baroh. Haduh 19 tylli ki College paidbah la dep ban mang na ka pla tyngka ka Jylla,” u la ong.
Haba kyntu ïa ki dkhot ba kin ai ïa ki jingai jingmut kiba tei ha ka jaka ban kynthoh, u la ong, “Ai jingmut ïa nga kumno ban pynjanai ïa ka CM-IMPACT, ngan leh ïa ka na ka bynta ka jingmyntoi jong ki khynnah pule jong ngi”.
U la bynrap, “Nga ai khublei shikatdei eh ïa u Myntri Rangbah ba 19 tylli ki college paidbah la dep ban mang na ka pla tyngka ka Jylla na ka bynta ki samla ba kin ïoh ïa ka jingnang jingstad”.
