Mawkyrwat, Nailar 27
Ka Hills Farmer Union (HFU) Sengkmie hapoh ka jingïalam u Bah Commander Shangpliang, President ryngkat ki dkhot ka SWKHD hadien ka jingud jingnam ki nongrep halor ka jingïap khlam ki sniang kaba la neh mynta la kumba 3 bad 4 bnai eiei, ha ka 27 tarik u Nailar 2026 ka la hiar jurip ïa kiba bun tylli ki shnong jong ka SWKHD ban ïakynduh mar khmat ïa ki nongrep jong ka dong ka thaiñ.
Ha kane ka sngi, ka Hills Farmer Union ka la ïoh ban sdang ïa ka jingjurip na ka thaiñ Shilliang Um kata naduh Nongbrei Nongdom, Mawthong, Mawsep, Rangblang ter ter shaduh Umdohlun bad ha ka jingjurip ki nongrep ki la pynpaw ïa ka jingduhnong kaba khraw namar ka jingïap khlam jong ki sniang namar bun na ki nongrep kane ka dong ka thaiñ ki im bad phah skul ïa ki khun ki kti lyngba ka kam ri sniang.
U Bah Commander haba kren sha ki lad pathai khubor u la ong ba ka seng ryngkat ka jingïatreilang bad ki Rangbah Shnong ka la pyrshang ban lum ïa ki kyrteng jong baroh ki nongrep kiba la ïap sniang ym tang ha distrik hynrei ha ka Jylla baroh kawei khnang ban leit rah hakhmat ka Sorkar na ka bynta ban pan ïa ka bailutksan.
U la ong ruh ba ki nongrep ki don hok ban dawa ïa ka bailutksan namar ka Sorkar kam shym lah ban pynurlong ïa ka jingdawa ka seng kata ban buh ïa ka jaka eksamin ïa ki sniang kiba wan nabar jylla.
U la ong ruh ba ka seng ka don ka jingsuba kaba jur ba ki dei ki sniang kiba nabar kiba wanrah jingpang shapoh ka Jylla.
Kumta ka HFU ryngkat ki nongrep ki dawa jur ïa ka Sorkar ba ka dei ban buh noh ïa ka jaka eksamin ban tes ïa ki sniang kiba wan nabar, ban pynbiang noh ïa ka dawai injek bad ïa ka injek ban ïada ïa ki sniang kiba dang im bad ban pynbiang ruh ïa ki nongtrei ki ban leit ai injek ïa ki sniang ha man la ki shnong.
U Bah Commander u kyrmen skhem ba ka Sorkar kan ai ïa ka jingïarap ïa ki nongrep namar ka Sorkar ha ka por ba shah tyllep ki bar jylla ha ki krem dewïong ka kloi ban ai jingïarap bad ka jingshah pynjulor ki kali Assam dang ha kine ki khyndiat sngi ruh ka noh jingïarap te ngeit skhem ba ïa ki nongrep ruh ka dei ban ai jingïarap bad khamtam ba ki dei ki trai ri trai muluk.
