Shillong, Nailar 27
Ki nongïasaid aiñ jong ka Jylla kiba don hapoh ka shatri jong ka High Court of Meghalaya Bar Association (HCMBA) bad Shillong Bar Association (SBA) ha ka sngi Palei ki la pynlong ïa ka jingïakhih da kaba ïaid paidbah ha nongbah Shillong.
Kane ka jingïakhih ki nongïasaid aiñ ka dei hadien ba la mih ka jingkynnoh ba u Advo-cate General u la kren hapoh ka jingtian bishar ha kaba ïadei ka jingshngaiñ jong ki kynthei ha ki Bar, kumta ki la dawa na ka Sorkar Jylla ban weng noh ïa u AG ka Jylla u Amit Kumar.
Ki palat spah ngut ki nongïasaid aiñ kiba ïashimbynta ha kane ka jingïaid paidbah ki la rah ïa ki plakad ha ryngkat ki jingthoh bad jingpyrta ba pynrem ïa u AG. Ïa kane ka jingïaid paidbah la sdang najan u mot Woh Kiang Nongbah da kaba ïaid ïa surok sha Barik, Malki Point, Lachaumiere, IGP bad la pynkut biang ha Mot Woh Kiang Nongbah bad kham hadien kane, kum ka dak ka jingpynrem jur ki la thang ruh u tyngshop dur jong u Amit Kumar uba long Advocate General ka Jylla.
Haba kren sha ki nongthoh khubor u Bah T.L Jyrwa Secretary ka BAR Association u la ong ba une u briew um dei u dkhot jong ka Association bad um tip eiei haba ïadei ka jingtreikam bad ki jinglong jingman hynrei u kloi ban shu kynthoh ïa ka Association.
Shuh-shuh u la ïathuh haba ïadei kane ka jingkynnoh ka Association ka la phah da ka jingthoh sha u Amit Kumar ban pan jingpynshisha haba ïadei ki jingkynnoh, hynrei kaba u la pynpaw ba um lah ban ai ïa ka jubab bad ka Association ka shim ïa kane ka jingkynnoh ka long beit tang ka jingpynthohbria ïa ka Association.
Nalor kata u Bah Jyrwa u la ong ba ka jingkren lap-lah jong u AG, ym dei ba ka ktah tang ïa uwei u ar kiba trei kum ki muktiar ha ka Jylla, hynrei kane ka la ktah salonsar ïa kiba na ka Jylla kiba trei ïa kane ka kam.
U Bah Jyrwa u la pynpaw ba ka kynhun ka dawa ruh ïa u Myntri Rangbah ka Jylla ban sangeh shi syndon ban lute ïa ka Jylla da kaba pyn-neh ïa u Amit Kumar kum u Advocate General, u ba ju ïaleh ban wanrah da ki briew lajong hapoh ka Jylla haba ïadei ki kam ba ha ka Jylla, ha kaba u la kynnoh ba kane ka jingleh jong u ka pynduh lad duh lynti ïa ki muktiar ba na ka Jylla ba kin kiew ha kane ka kam.
