Shillong, Nailar 27
Ka MLA ka NPP na Gambegre ka Dr. Mehtab Chandee A Sangma ha ka sngi Palei, kala ai jingïaroh ïa ka CM-IMPACT Programme halor ka jingthaw rikod ka Meghalaya ha ka jinglah ban leh bha ha ka SSLC bad kala ong, ba ka Jylla mynta ka dei pat ban pynleit jingmut ha ka jingai ïa ka jingpule kaba don kyrdan bad ka jingïoh ïa ki lad ha ki thaiñ nongkyndong.
Haba ïashimbynta ha ka Short Duration Discussion halor ka pule puthi ha ka Jylla kaba la wanrah da u MLA ka UDP Bah Paul Lyngdoh, ka Dr. Mehtab kala ong ba ka jingtuklar ka Sorkar kala pynkylla noh ïa ka jinglong jingman ha ka rukom kaba leh sniew ha ki snem kiba la leit noh.
“Ka CM-IMPACT programme kala pyni ïa ka risol kaba khraw. Namar ka CM-IMPACT ngi lah ban ïohi ba ka percentage jong ka jingpass kala kiew ha ka eksamin SSLC na ka 54.80% sha 97.26% mynta u snem. Ka jingiehnoh shiteng por ïa ka jingpule kala hiar kynsan na ka 17.4% sha ka 6.7%,” ka la ong.
Ka Dr. Mehtab kala maham pat ban pynïaryngkat dor ïa ka jingkiew ha ka jingpass bha bad ka jinglah ban leh bha pat ha baroh ki liang.
“Watla katei ka risol kala long kaba ai mynsiem, ngi donkam ruh ban shimkhia ïa ka jinglong jingman baroh. Ka rukom ai ïa ka jinghikai kaba paka bad ka rukom pyrkhat kaba janai ki dei ki bynta kiba hap ban shimkhia bha,” ka la ong.
Ka Dr. Mehtab kala pynpaw ïa ka jingduna ha ka jingdon ïa ki skul HSSLC ha ki thaiñ nongkyndong jong ka jylla Meghalaya bad ka pynpaw ba kiba bun hi ki Higher Secondary School ki don bha ha Shillong bad Tura.
“Ha ka konstitwensi jong nga, ka don thik tang kawei ka skul HSSLC. Haduh mynta ki khynnah pule ki hap ban pynlut por haduh 2-3 kynta ban leit sha ki jaka pule. Kam shym la don kano-kano ka jingbhah ka ban biang ïa ka rukom don ïa ki skul HSSLC ha ki District,” kala ong bad ka kyntu ïa ka tnad pule puthi ban pynlong ïa ka jingsorjamin ha manla ki district khnang ba ka jingsam ne jingbhah kan long kaba mar katjuh.
Kala kren ruh ïa ka jingdonkam ïa ki Agriculture-based Skilling Centre ha ki thaiñ nongkyndong ban plie lad ïa ki khynnah pule ki bym lah shuh ban bteng ïa ki jingpule ki jong ki hadien ba kila pyndep ïa ka SSLC.
“Ngi dei ka imlang sahlang kaba shaniah ha ka rep ka riang. Ngi la don mynta ïa la ka jong ka skulbah. Katto katne ki Course bad Curriculum lah ban pynwandur ki ban ïahap bad ki samla. Ngi donkam ïa ki jaka ai jinghikai pyntbit kiba ïadei bad ka rep ka riang ha ki thaiñ nongkyndong,” kala ong.
“Ki samla pule na kiba bun ki daw ki bym lah ban leit shabar ne kim lah ban bteng shuh shuh ïa ki jingpule ki jong ki, ki dei ban ïoh ïa ki lad bad kabu ban pule ha ki Vocational Studies kiba la pynwandur na ka bynta ka jong ki,” kala bynrap.
