Khliehriat, Nailar 27
U Basil Khonglah ha ka 26 tarik Nailar u la ujor sha ki pulit ka Umkiang Police Patrol Post ba u nongtrei jong u, u Kornal Ahmed la kynnoh ba u la shah rahbor ha ki briew kiba la suba ba ki dei ki nong Bangladesh kaba la jia ha ka 26 tarik Nailar ha ka shnong Wahkoh, East Jaiñtia Hills District.
Tang shu ïoh ïa ka jingujor, ki pulit na Umkiang kila leit mar mar bad la lap ïa u Kornal Ahmed harud surok hapdeng ka jingmynsaw ryngkat bad ka jingphlei snam ka kti kamon bad mar mar la pynkit noh ïa u sha Umkiang PHC ban ïoh jingsumar.
Ha ka jingtohkit ki pulit kila lap ba u Kornal Ahmed u la leit sha Wahkoh ryngkat bad u Gopal Marak bad u Jakir Hussain ban leit shim ïa ka pisa kaba long 2 lak tyngka katkum ka jingbthah jong u Allim Uddin na ka shnong Jalalpur, Assam.
Hadien kata, ki pulit kila leit ban kem noh ïa u Gopal Marak na Pyrtakuna bad ha ka jingtohkit, u la phla ba u Allim u la bthah ïa ki ban leit sha Wahkoh bad ai ruh ïa u mobile number jong u briew uba dei ban shim ïa ka pisa.
Ynda poi ha Wahkoh, u Kornal Ahmed u la leit ïakynduh ïa kita ki briew, bad la kynnoh ba ha kum kata ka por haduh 3-5 ngut ki briew kiba rah da ki wait, ki la mih na khlaw bad kem jubor ïa u, katba u Gopal bad u Jakir kila phet krad na katei ka jaka bad leit noh sha Umkiang.
Ha kaba ïadei bad kane ka jingjia ki pulit ki dang pynlong ïa ka jingtohkit.
