Shillong, Nailar 27
U Conrad K Sangma, Myntri Rangbah ka Jylla ha ka sngi Palei jong ka taïew u la ong, ba ka dor jong u kubi, kaba la hiar sha ka T.2 shi kilo, kaba pynbor ïa ki nongrep ban shu sam ei, mynta ka la kiew biang sha ka T.20-25 shi kilo.
Ïa kane ka mat la wanrah ha Ïingdorbar Thawaiñ da u MLA ka Nongkrem bad President ka Voice of the People Party (VPP), u Bah Ardent Miller Basaiaw-moit .
Haba tuklar ha ka jingai jubab u Myntri ba khmih ïa ka kam rep u Timothy D Shira, na ka liang u Myntri Rangbah u la ong ba ka jinghiar dor ha u bnai Naitung, kadei kaba ju jia man ka por, kaba ïohi ha kine ki 10 snem ba la leit noh ruh.
“Ngi la ju ïohi beit ïa ka jinghiar ka dor ha u bnai Naitung. Ka jingkheiñ jong ngi ka long, ba ka don ka jingwan pynpoi kubi kaba bun bha na kiwei ki Jylla ka thaiñ Shatei Lam Mihngi ha kane ka por. Ngi la khmih ïa ka jingpynpoi mar baroh kawei, kynthup ka Guwahati bad kiwei ki ïew” la ong u Conrad.
“Ngim lah ban ong ba ka rukom pynïaid ka la jakhom haba pynshong nongrim tang ha ka shisngi. Ka jingpynpoi bun ka mar na kiwei pat ki bynta bad jingdon bun ka mar, ka lah ban lam sha kane ka jinghiar dor, hynrei mynta ka la kot biang sha ka T.20-25 shi kilo” u la bynrap.
U Conrad Sangma u la ong, ba ki don katto-katne ki daw kiba ka Sorkar kam lah ban leh eiei, hynrei ka la khmih bha ïa ka jinglong jingman.
Shuwa kane, u Myntri ka kam rep u la ong ba ka tnad ka la shimkhia ïa kane ka jingjia.
“Nga la tip ïa ka jinglong jingman bad nga la khot ïa ka jingïalang jong ka tnad rep. Ka dor ka la long biang kumba ju long mynta bad kaei kaba u dkhot u la ai jingmut ngi la buh jingthoh ban leh eiei” la ong u Timothy D Shira.
