Shillong, Nailar 27
U Myntri Rangbah Conrad K Sangma ha ka sngi Palei u la ong ba ka Meghalaya kala jam shakhmat ban long ka Jylla ba bun eh ka jingrep ‘organic’ hapoh ka Ri bad ka Sorkar ka kwah ban pynduna bad khatduh ban pynduh syndon ïa ka jingpyndonkam sboh dawai.
“Ngi hap ban kynmaw ba ka khubor kaba heh ka long ba ka Meghalaya bad ka pyrthei baroh kawei ka dang pyrshang ban jam sha ka kam rep ba khlem leh dawai (organic). Ngim don hangne ban pynshlur hynrei ban pynsngewthuh ïa ki nongrep ban nym pyndonkam ïa ki dawai. Ngi la sdang pyndonkam da ki ‘bio-fertilizer’ ne ki sboh khñiang. Ngi la don ha ka jingpynkylla bad ngi kyrmen ba shisien ka sngi ngin ym don shuh ïa kino kino ki kynja sboh dawai,” ong u Conrad ha ïingdorbar thawaiñ.
“Ka lynti kaba dei bala leh da ka pyrthei baroh kawei ka long ban tes ïa ka khyndew. Ngi la jam mynta ban nang pynbun ïa ka jingai syrnot ha ka kam rep ba khlem khleh dawai bad ka Meghalaya ka long kaba la pynkhreh bha mynta,” u la ong.
U Myntri Rangbah u la bynrap ïa ka jubab jong u Myntri ka rep ka riang Timothy D Shira halor ka jingkylli u President ka VPP bad MLA ka Nongkrem halor ka jingpynbor ïa ki nongrep ban thied ïa ki SSP ha ka dor ba T.900 shi byrni.
Haba pynshai ïa ka dor, u Conrad u la ong, “T.266 ka dei na ka bynta ka urea bad ki dkhot kila kylli ïa ka SSP. Ka urea ka long T.266 bad ka dor ka SSP ka long T.800 shi byrni ha ka dor subsidy. Ka subsidy ka long 25% bad ka dor ïew ka long T.1200”.
Halor ka jingpyrkhing ïa ki kam khaïi tuh, u Myntri Timothy D Shira u la ong ba kam don lynti satia ban khaïi tuh ïa ka SSP namar ka jingpeitthuh kaba pyrkhing bha.
“Ki don haduh 129 ngut ki Inspector bad ki ju leit talasi man ka por. Baroh ki nongdie ki hap ban wah ïa ka dor bad die ha ka dor bala buh da ka Sorkar. Ka long kongsan ba hap pynrung ïa man ki mar ba die hapoh ka Integrated Fertilizer Management System (iFMS). Lada die black shi kilo, ïa kane lah ban buddien,” ong u Timothy.
U ïathuh ba la aibor ha ki Director ka tnad Agriculture bad Horticulture ba kin pynlong ïa ki jingtalasi.
U Myntri Rangbah u la bynta ba haduh 1,432 sien la pynlong ïa ka jingtalasi ba syndet-syndet kat haduh mynta.
“Hooid, la leh ïa ki jingtalasi ba syndet-syndet bad haduh mynta la dep ban leh haduh 1432 sien. Lada lap ïano-ïano kiba thmu leh tam, lah ban pynduh pyndam syndon ïa ka laisen jong ki. Yn shim ki lad pynshitom katkum ki kyndon ka aiñ,” u la ong.
