Shillong, Nailar 27
U MLA ka VPP na Mawlai Constituency u Bah Brightstarwell Mar-baniang ha ka sngi Palei u la kynnoh ïa u Myntri Rangbah ka Jylla u Conrad K Sangma ba u la pynjah burom ïa ki nonghikai kolej deficit da kaba kdew ïa ka tulop kaba la pynkiew bad u la ong ba ka rukom hikai ha Meghalaya naduh ka KG haduh ka PG ka don ha ka jinglong kaba sngew-sih shibun.
Haba ïashim bynta ha ka jingïakren kaba lyngkot halor ka pule puthi kaba la wanrah da u nongthaw aiñ ka UDP u Bah Paul Lyngdoh hapoh ka ïingdorbar, u Bah Brightstarwell u la ong ba ka jingpynhiar ïa ka kyrdan pule ka la long kumba pynjot ïa ka lawei ka jaidbynriew.
“Ka don ka jingong ba ban pynjot ïa kano-kano ka jaidbynriew kam donkam ban pyndonkam da ki “atom bomb” lane ban pyndonkam da ki namding ba jngai, ka donkam tang ban pynhiar ïa ka kyrdan pule,” la ong u Bah Bright.
U la ong ba katba kiwei pat ki dkhot ki la pynpaw ïa ki jingshisha bad ki jingkheiñ, ka jingpule ka batai ïa ka jingkiew jong ka Jylla ha man la ki liang.
“Ka jingkhyllem jong ka pule puthi hi ka dei ka jingkhyllem jong kawei ka jaidbynriew. Ym dei tang ma ngi kum ki dkhot jong kane ka ïingdorbar kiba sngewthuh ïa kaei kaba jia ha ka rukom pule puthi, uwei pa uwei u khynnah skul, ki kmie ki kpa bad uwei pa uwei u nongshong shnong ki sngewthuh,” u la ong.
Haba pyrshah ïa ka jingkren jong u Myntri Rangbah ka Jylla dang shen halor ki nonghikai deficit, u Bah Bright u la ong, “Ha kiwei pat ki sngi, u Myntri Rangbah haba u kren shaphang ki nonghikai, khamtam shaphang ki nonghikai deficit, da kaba kren beiñ nga lah ban ong ba u pyrshang ban pynjah burom ïa ki nonghikai da kaba kdew ba don napdeng ki nonghikai kolej kiba ïoh pisa palat ïa ka Saw lak tyngka haduh saw lak sanphew hajar tyngka shibnai .”
“Nangno u Myntri Rangbah ka Jylla u ïoh ïa kane ka jingkheiñ? Lada ïaid katkum ka tulop katkum ka kam ba la mynjur da ka UGC, wat u nonghikai ba kham rangbah uba dei u paralok jong nga uba hikai ha St. Anthony’s College u dang ïoh 3.50 lak tyngka ha shi bnai” u la ong.
U Bah Brightstarwell u la ong ba uwei pa uwei u nonghikai naduh ki lower primary haduh ki higher education ki dei hok ban ïoh ïa ka tulop kaba bha tam namar ka lawei jong ki khynnah bad ka jaidbynriew ka shong ha ki kti jong ki.
“Nga dei uba mih na ka Government Boy’s Higher Secondary School, nga dei uba mih na ka St. Anthony’s College kaba dei ka kolej kaba dei ka private deficit bad nga dei uba mih na ka North Eastern Hill University kaba dei ka skulbah jong ka Sorkar Pdeng. Lada ym dei namar kine, ngam lah ban pyndep ïa ka jingpule jong nga,” u la ong.
U la pynpaw ba ki kam ba lait ha ki skul Sorkar, ki kolej deficit bad ki kolej Sorkar ki la sah thylli ha kine ki 2-3 snem ba la dep.
