Shillong, Nailar 27
U Myntri Rangbah Conrad K Sangma ha ka sngi Palei u la pynphai nia kylla ïa ka jingkynnoh u President ka Voice of the People Party (VPP), u Bah Ardent Basaiawmoit, uba dei ruh u MLA ka Nongkrem ba ka Sorkar ka la kyntait ban ai song jingïarap ïa ki longïing jong ki san ngut ki briew kiba ïap ha ka jaka bylla ha Shillong, haba pynpaw ba ïa ka song jingïarap la dep pynlait na ka Chief Minister’s Special Grant (CMSG) khlem da pynmih khubor.
Haba jubab ïa ka Call Attention Notice ba wanrah da u Bah Ardent, u Conrad u la ong ba ka khubor ba kyntait ban ai ïa ka song jingïarap, kadei ka bym dei satia. “Ia ka song jingïarap la dep ban ai sha ki longïing ki lanot ym na ka State Disaster Mitigation Fund (SDMF) hynrei na ka Chief Minister’s Special Grant. Kumta ban ong ba khlem ai ïa ka song jingïarap, kadei ka bym dei satia” ong u Conrad hapoh ka Iingdorbar.
U la batai ïa ka song jingïarap hapoh ka SDMF, la mang beit thik tang ha ki jingjia pynjulor ka mariang kaba hap hapoh ka State Disaster Response Fund (SDRF) bad kam dei kaba lah ban pyndonkam ha kiwei pat ki jingjia aksiden, namar ka jingbatai kyrpang jong ka.
“Hynrei, ka don ka song pisa hapoh ka CMSG. Kam don satia kano-kano ka kyndon ba kyrpang, namar teng teng ki daw jong ki jingjia ki ïapher. U Myntri Rangbah u don ïa ka hok ban ai ïa ka song jingïarap. Hynrei ka long kaba eh bha, namar shisien ba ngi sdang ban kyrshan ïa kino-kino ki jingjia aksiden, kan kylla long ka rukom bad ka hok lada don kano-kano ka jingjia ba kin khmih lynti ïa ka CMSG”.
U Conrad Sangma u la ong, ba ka Sorkar ka jied ban leh eiei khlem da heh nia halor jong ka. “Ka nongrim jong ngi ka long kaba shai, kumba ju ong u Myntri ka Tnad Veterinary ha ki jingkren- Ngi trei kham bun ïa ka kam, ngi pynduna ïa ka jingkren. Ngi la ai ïa ka song pisa hynrei ngi khlem pynlong ïa ka kum ka khubor kaba heh. Ngi sngewthuh ïa ki jingeh jong kine ki longïing bad kane ka jingjia bad kumta ngi la kyrshan ïa ki lyngba ka CMSG, khlem da heh nia, khlem da pynbna paidbah, khlem da shna ïa ki social media reel” u la ong.
“Ngi ngeit ba ki kam jong ngi ki kham kongsan ban ïa kaba pynlong khubor na ka. Lehse dei kane ba u dkhot bad ki lad pathai khubor kim shym la tip. Ngim kwah ban pynheh ïa ka, ngi la ai jar-jar ïa ka song jingïarap” la bynrap u Myntri Rangbah.
Halor kane, u Bah Ardent u la pynphai nia “Kum u dkhot ba don jingkitkhlieh, ngi la kren ïa kane haba pynshong nongrim ïa ki khubor ba mih ha ki lad pathai khubor. Kam dei ba ngi kwah ban kren bun bad trei duna”.
