Shillong, Nailar 27
Na ka jingsaphriang kawei ka durkhih ba uwei u bar Jylla u ba la kynthoh da ki kyntien bym ïahap ha ka imlang ka sahlang, ha ki rynsan paidbah (Social Media) pyrshah ïa ka Jylla Meghalaya, ka All Khasi Meghalaya Tourist Taxi Association ka la ïoh ban bat ïa utei u bar Jylla bad phah ïa u ban panmap paidbah.
Haba ïoh ban ïakren ïa u Bah Ricaldinus Dohling President AKMTTA, u la ïathuh ba ki dkhot ki la ïoh ban bat ïa utei u briew ha ka 26 tarik u Nailar ha ka jaka ïeng kali kaba don jan ka City Hut Dhaba, Shillong.
U Bah Ricaldinus u la ong, ba ka jingkren jingkynthoh utei u bar Jylla ïa ki nongshong shnong kiba dei na ka jaidbynriew Khasi ka dei ha ka por ba don ka jingpakhang ïa ki kali tourist Meghalaya sha Assam bad katei ka jingkynthoh ka long kaba la pynjah burom ïa ka jaidbynriew Khasi ha kaba utei u bar Jylla u la kynthoh ryngkat ki ktien sih ktien khlemakor.
Shuh-shuh u la ïathuh ba utei u bar Jylla u dei u ba ñiah kali tourist bad uba ju wan ban kamai sha nongbah Shillong bad ka AKMTTA ka la phah panmap paidbah ïa utei u briew.
U Bah Ricaldinus u la ong kum kine ki jingjia ki la ju jia teng bad ka AKMTTA kam shym leh eiei ne aiti ha ki bor ka aiñ, hynrei ka shu phah panmap, namar ba kam kwah ban pynjynjar ïa ki para ba ïa kamai kali, katba nangne shakhmat u la maham tyngeh ba lada dang lap ba don kiba dang bteng ban kynthoh khlem nongrim, ka AKMTTA kan aiti beit sha ki bor ka aiñ ban leh ïa kaba donkam katkum ki kyndon ka aiñ.
