Shillong, Nailar 27
Ki pulit ka East Khasi Hills District ha ka sngi Palei ki la khot hajir ïa ki phra ngut ki nongïalam ka Khasi Students’ Union (KSU) ha kaba kine ki dkhot ki la leit sha thanad Sadar ban pynkohnguh ïa ka jingkhot jong ki, katba haba ki la leit ki la hap ban leit phai noh hadien ba ki pulit ap khyrdop katei ka thanad kim shah satia ïa ki ban rung shapoh.
Kane ka jingshah khot hajir jong ki, ka dei halor ki jingjia ba mih ki kam thombor ha ka 19 tarik u Nailar ha ka por ba ka KSU ka pynlong ïa ka jingïaid rally ba da ki thuk-thuk bad rah lama ïong ha ka nongbah Shillong.
Kiba shah khot hajir ki kynthup ïa u samla Pynshai Rani Assistant General Secretary KSU, u samla Pynshai Dkhar Information and Publicity Secretary, u samla James Mawphniang, u samla Erick Nongkynrih, u samla Alralick Kharjana, u Samla Shaining Kharbikhiew, u samla Cleanser Shabong bad u samla Gery Mawlieh.
Haba kren sha ki nongthoh khubor u samla Pynshai Rani Assistant General Secretary KSU u la ong ba ki burom ïa ka jingshah khot jong ki bad ki la poi lut ruh baroh phra ngut ha thanad Sadar, hynrei haba ki la poi ha khyrdop katei ka thanad kim shym la shah ïa ki ban rung shapoh, “Ngim don por ban ap slem, ban ïeng sah hangto, namar ngi don la ka jong ka kam ban pyndep” u la ong.
“Kaei kaba nga kwah ban ong ka long ba ïa ka sngi jong ngi kaba phi buh, ngi la pyndep. Sngewbha nai phah shuh ïa ngi ki jingkhot, ïa ngi baroh phra ngut ki nongïalam jong ka CEC ïa kaei ka kamram ba phi dei ban leh kum ka tnat pulit phin leh hi la ka jong ka kamram” la ong u Bah Pynshai.
Haba kylli ïa ka daw ba balei ym shah ïa ki ban rung hapoh ka thanad, u Bah Pynshai u la ong ba um lah ban tip ïa ka daw, ha kaba u la pynpaw ba na ka liang jong ki, ki la pyni ïa ka jingthoh ba ka tnad pulit ka khot hajir ïa ki, hynrei ki pulit ba ap khyrdop ki sngap jar-jar.
