Shillong, Nailar 27
Ka jingkren jong u Marcuise N. Marak, Myntri ba dei khmih ïa ka tnad PHE ka Sorkar Jylla, haba ïadei bad ka New Shillong Water Supply Scheme, kaba T.850 klur ba yn nym lah ban aiti sha ki kontraktor ka Jylla, namar kiba bun ki jingeh, ka la pynlong ïa ki nongïalam ka Khasi Jaiñtia Government Con-tractor and Supplier Association (KJGC&SA) ban pynpaw ka jing-sngewsih kaba jur halor kane.
Haba kren sha ki lad pathai khubor, u Bah F.D Ramsiej, Working President, u la ong ba ka jingkren u Myntri kan dei kaba sah jingkynmaw ha kane ka Jylla baroh kawei, namar ba ka long ka jingñiew beiñ ïa ki trai Jylla.
U la ong ba ki trai Jylla ruh ki la lah ban trei ïa kiba bun ki kam kiba da ki spah klur bad ka Sorkar halor kane ka bynta ruh, kam shym la khot ïakren ïa ki hynrei ka la shu rai hi marwei.
Shuh shuh u la ong ruh ba ka jingleh ka Sorkar Jylla ka pynpaw shai ba ka dei jong ki bar jylla ym jong ki trai jylla bad ban bynrap ba lada kam pynduh ïa kane ka jingthmu, kim banse ban mih madan ban pynlong da ka jingïakhih.
“Shibun ki kontraktor na ka ri Khasi bad Jaiñtia, kiba lah ban trei ha ki kam kiba da ki phew klur hynrei ka jingong jong u Myntri ba khmih ïa ka tnad PHE ka Sorkar Jylla, ka la pynsngewsih bha ïa ngi,” u la ong.
“Ngim lah ban pdiang ïa ka jingkren jong u Myntri ha Ïingdorbar ka Jylla,” u la bynrap.
U Bah F.D Ramsiej u la ong ba ka kynhun ka dawa panmab na u Myntri uba la kren ïa kum kine ki kyntien, kaba la long noh kumba u ibeiñ ïa ki kontraktor kiba na ka Jylla lajong.
Namarkata, u la dawa ba ka Sorkar kadei ban pynsangeh shuwa ïa kane ka tender, namar ka jingshah kheiñ beiñ palat ïa ki kontraktor kiba na ka Jylla, hynrei ki ai pynban sha kiwei pat ki briew.
