Nongpoh, Nailar 28
Ki bor pynïaid distrik ka Ri-Bhoi ki la pynmih da ka hukum ban khang mardor ïa ka jingthmu leit sieh ‘Signboard’ u Syiem ka Hima Sohïong sha ka shnong Umshalini ha Ri-Bhoi District, ka jaka kaba dang ïa ka jia pud bad ka Hima Jirang.
Kane ka hukum kaba la pynmih ha ka 27 tarik u Nailar da u Dr. Abhishek Saini, Deputy Commissioner ka Ri-Bhoi, ka ïathuh ba u Syiem ka Hima Sohïong la antad ba un leit sha katei ka shnong Umshalini ha ka 29 tarik mynta u bnai Nailar na ka bynta ban sieh ne buh ‘Signboard’ ha katei ka shnong.
Kumba katei ka jaka ka dei kawei na kiba don hapdeng ka jingïa ka jia pud hapdeng ka Hima Sohïong bad ka Hima Jirang bad ruh ka jingpyrshah ka Sorkar Assam halor ka jingtei surok ha katei ka thaiñ, katei ka jingthmu leit hiar u Syiem ka Hima Sohïong ka lah ban wanrah ïa ka jingïapyn-ibor bad ka jingthut ha ka shongsuk shongsaiñ.
Ha katei ka hukum kaba la pynmih hapoh ka kyndon 163 jong ka Bharatiya Nagarik Suraksha Sanhita, (BNSS) 2023, la mana pyrshah ïa ka jingïalang ba palat 5 ngut ki briew, kynthup ïa ki ‘riew shimet hapoh katei ka shnong Umshalini bad khang ruh ïa ki nongïalam ka Hima Sohiong bad Hima Mawtamur lem bad kiwei de kiba don jingïadei bad ki, ba kim dei satia ban wan sha Ri-Bhoi District la ka dei ban pynlong jingïalang ne kiwei-kiwei ki jait kam.
La khang ruh ïa kino-kino ki nongkyrshan ne kiba wan hapoh ka Hima Sohïong ba kim dei satia ban sieh, pynïeng ne pynkylla ïa ki ‘Signboard’, ki jingthoh bad ki jingtei kiba don hapoh ka shnong Umshalini ban pyni ïa ka jingkam trai ka jong ki ïa katei ka jaka.
Shuh shuh, la maham ruh ba yn ym shah ïano-ïano ruh ban leh kino-kino ki jait kam kiba lah ban wanrah ïa ka jingpyn-i bor markylliang, ban kynshoit wanrah jingklumar ne pynthut ïa ka shongsuk-shongsaiñ ha katei ka jaka bad kiba leh pyrshah kin shah pynshitom hapoh ka kyndon 223 jong ka aiñ Bharatiya Nyaya Sanhita, 2023.
Kane ka hukum kan treikam mardor tad haduh ba la pynbna da kumwei pat bad la bthah ruh ïa ki bor pulit bad ka ophis jong u Sub-Divisional Officer (Civil), Patharkhmah, ba kin shim ïa ki sienjam ban ïada na kino-kino ki jingjia ba sngewsih bad ban pyntikna ïa ka jingbud ryntih ïa kane ka hukum.
