Nongpoh, Nailar 28
Uwei u heprit ba dang 5 snem ka rta u la duh noh la ka jingim hadien ba u la kum hap sha ka wahduid kaba la heh kynsan na ka jingther jong u ‘lapbah uba la neh bun kynta. Kane ka jingjia ka dei hapoh ka shnong Noksikgittim jong ka thaiñ Killing ha Ri-Bhoi District.
La ïathuh ba utei u heprit uba la tip kyrteng kum u Mewanshwa Mawblei u dang muja ka lehkai shabar jong ka ïing hashuwa ba u kum leit hap sha katei ka wahduid kaba heh kynsan namar ka jingther jong u slap, kat haduh ba un shah rong bad duh syndon la ka jingim.
Na ka liang ki paidbah nongshong shnong ha ryngkat bad ki bor pulit ki la pynlong ïa ka jingwad ïa utei u heprit bad ha ka por kumba 11 baje duna hynne ka step, la lap noh ïa u bad mar-mar la pynkit sha P.A. Sangma International Medical College & Hospital na ka bynta ban ïoh jingsumar, hynrei ki doktor katei ka jaka sumar ki la pynbna ba u lah dep khlad lypa.
