Shillong, Nailar 28
Ki lai ngut ki briew na Tamulpur Assam ki la shah kem na ka jingkynnoh ba ki la pyrshang ban die tuh ïa ki arshaka ha Weiloi East Khasi Hills.
U Superintendent of Police ka East Khasi Hills, u Bah Vivek Syiem u la ong ba ki la shimkhia ïa kane mar sien ïoh jingtip ha ka 27 tarik Nailar bad ki pulit ka Mawsynram ki la ïoh ban kem ïa kitei ki lai ngut, katba uwei u paralok jong ki u la phet rieh sha khlaw.
Shuh-shuh u SP u la ïathuh ba la ïoh ban kurup lai tylli ki arshaka (Bike) kiba la suba ba ki dei kiba shah tuh, ar tylli ki dei ki Yamaha R15 kiba don ïa u nombar AS-01-FV-4193 bad AS-27-F-1263 bad kawei ka Royal Enfield Hunter 350 kaba don ïa u nombar AS-25-Z-1346.
Kitei kiba la shah kynnoh donkti ki la don ha phatok na ka bynta ban pynshisha bad leh ïa kaba donkam katkum ka aiñ bad la pyntip sha ki pulit Assam, la ong u SP bad bynrap ba ka jingthwet ïa utei uwei pat u ba lait phet ka dang ïaid shakhmat.
