Shillong, Nailar 28
Ka Sorkar Meghalaya ka la pynbna ba ka la pynjlan ïa ka One Time Settlement Scheme (OST) ban siew ïa ki khajna haba ïadei bad ka Motor Vehicle Tax, ka Passenger & Goods Tax bad ka jingsiew ïa ka Fitness haduh ka 31 tarik u Risaw 2026.
Haba ïakren sha ki nongthoh khubor ha ka sngi Thohdieng u Bah Wanshuwa Nongtdu President ka All Meghalaya Truck Owner, Driver & Welfare Association (AMTOD&WA) u la ïathuh ba ha ka 21 tarik u Nailar ka synjuk ka la wan ban buh da ka jingthoh sha u Commissioner and Secretary ka tnat Transport u Sanjay Goyal, IAS ban kyntu ïa ka tnat ban pynjlan ïa ka jingsiew ïa ki khajna jong ki trok, da kaba shim kabu ruh ïa ka skhim ba ka Sorkar ka wanrah kata ka One Time Settlement Scheme. Na ka liang u Bah Nongtdu u la ai khublei ïa u Commissioner and Secretary ka tnat Transport u Sanjay Goyal kumjuh ïa ka kynhun jong ka tnat ba la sngap ïa ka jingkyrpad jong ki nongbuh trok bad ki nongñiah trok ha kaba ka tnat ka la pynbna ba la pynjlan ïa ka por ban siew ïa ki khajna jong ki trok haduh ka 31 tarik u Risaw 2026.
Shuh-shuh u la la pynpaw ba na ka liang jong ka synjuk ki nongniah trok ka la kyrpad ïa ka tnad transport ban pynjlan haduh u bnai Nohprah, hynrei ka la don ka jingïakren hapdeng ka synjuk bad ka Sorkar ha kaba la Sorkar ka la ai por tang haduh ba kut jong u bnai Risaw 2026 u la ong, “Kane ka long ka jingmyntoi ïa ki nongbuh trok namar ki don ki bym pat ïoh lad ban siew ha ki por ba ka Sorkar ka la buh.”
Haba bynrap u bah nongtdu u la ong ka jingïaid lynti jong ka AMTOD&WA ka la mat ïa kiba bun ki jingshah kynnoh bad ki jingshah kynthoh, hynrei kim don jingsngewpher eiei ïa kata namar ba ki trei na ka bynta ka jingmyntoi ki paidbah.
Nalor kata u la kyntu ïa ki nongbuh trok ban shim ïa kane ka kabu ba ka Sorkar ka la ai ïa ki namar ïoh ka Sorkar hadien kan ym ailad shuh, u la ban jur ïa baroh ba kin siew noh ïa ki khajna jong ki kali jongki khnang ba kan ymdon shuh kano-kano ka jingshah pynthud ha ki lynti ki syngkien nangne shakhmat.
