Shillong, Nailar 28
U symbud myntri rangbah ka jylla u bah Prestone Tynsong u la ong ba ka sorkar Meghalaya ka dang pynthikna lada don kino kino ki nongshong shnong ka jylla kiba sahkut ha Nepal kaba la shah ktah ha ka jingshlei um.
U bah Tynsong u la sngewlem ruh halor ka jingduh noh ia ki mynsiem briew ha Nepal bad pyntip haduh mynta ym don na Meghalaya kiba ngat ha katei ka apot.
“Ka long kaba sngewsih shibun. Ka jingsngewlem jong ngi ka leit sha ka Nepal baroh kawei,” u la ong.
Halor ka jingtohkit lada don mano mano na Meghalaya kiba shah ktah ha katei ka jingjia, u bah Tynsong u la ong, “Ngim pat ioh jingtip eiei. Nga la dep bthah ia u Chief Secretary bad ia u DGP ban wad bniah lada jia ba don ki nongshong shnong ka Meghalaya kiba don hangtei. Haduh mynta ka khyllipmat, ym pat don jingtip eiei.”
Da kaba pynskhem ba ka jylla ka long kaba la pynkhreh ban ïakhun ïa kano kano ka jingeh kaba kyrkieh, u la ong ba ka Meghalaya ka dang long kaba la pynkhreh pura na ka bynta kano kano ka jingjia, la ka long ha ka jylla ne shawei pat ha ka ri.
Halor ka jingshlei um ha Jorabat ha ka por slap, u Tynsong u la ong ba katei ka jaka ka hap hapoh ka NHAI ym hapoh ka jingpeit ka tnad PWD jong ka jylla. U la ong ba ka NHAI ka don ka jingkitkhlieh ban maramot bad shna ia ka surok bad ka la dei ban leh ia ka jingjurip bniah ia ka kyrdan jong ka surok shwa ban shimti ia ka kam.
“Nga la pynlong jingialang bad ki heh ka NHAI bad nga la ong ia ki ban pynlong biang ia ka jingjurip kaba bniah bad ban leh ia kaba donkam, namar wat lada slap rit ruh, ka surok ka shah rong noh ha ka um slap,” u la ong.
U Bah Prestone u la ban jur ba kane, kam shym la hap hapoh ka jingpeit jong ka sorkar jylla.
