Shillong, Nailar 30
Ka National Board of Examinations in Medical Sciences (NBEMS) ka la pynlong ïa ka eksamin NEET-PG 2026 ha ka 30 tarik u Nailar 2026 ha kylleng ka ri da ki jingpynbeit ba bniah ha ka liang ka jingpynbiang, ka teknoloji, ka jingshngaiñ bad ki nongtrei ban pynthikna ïa ka jingpynlong eksamin kaba khuid, kaba shngaiñ bad kaba ïaid beit ïaid ryntih.
La pynkhreh ban pynlong ïa ka eksamin na ka bynta ki 2,73,096 ngut ki kandidet ha 1,111 tylli ki jaka thoh eksamin ha kylleng ki 339 tylli ki nongbah, kaba kynthup ïa baroh 36 tylli ki Jylla bad ki Union Territory. Baroh ki don 2,65,980 ngut kiba la ïaleh ïa kane ka eksamin bad la pyndep ïa ka eksamin na ka bynta kumba 2,63,535 ngut ki kandidet.
La kyrshan ïa ka eksamin ha baroh kawei ka ri da ka jingpeitngor kaba mardor bad ki lad jingïada kiba pyrkhing bha. La thung haduh 2,527 ngut ki nonghikai kum ki nongpeit ba laitluid ban peit ïa ka jingpynïaid ïa ka eksamin. Nalor kata, palat 700 ngut ki nonghikai ba kham rangbah, kynthup ïa ki Dean, ki Director, ki Medical Superintendent bad ki Professor, la thung kum ki dkhot jong ka Flying Squad.
Ha kaba ïadei ban pynkhlaiñ ïa ka jingïatreilang bad ka jingpeitngor, la pyntreikam ïa 16 tylli ki NBEMS Regional Command Centre ha kylleng ka Ri. Ha ki jaka thoh eksamin la buh ruh hapoh ka jingpeitngor jong ka live CCTV, ïa kaba la ïai buddien na ka NBEMS Command Centre ha ka Headquarter jong ka ha Dwarka. La thung ïa ka kynhun ba kyrpang kaba don 190 ngut ki briew na ka NBEMS bad TCS na ka bynta ban peitngor bad buddien mardor.
Ha ka Command Centre ba kyrpang ha ka ophis treikam jong ka NBEMS, ki ophisar na ka NBEMS, ka Tnad ka koit ka khiah, ka BEL, ka ECIL bad ka TCS ki la ïaibteng ka jingpeitngor ïa ka rukom leh eksamin baroh shisngi.
Kum shi bynta ban pynkhlaiñ shuh-shuh ïa ka jingshngaiñ ha ka jingpynlong ïa ka eksamin bad ban ïada na ka jingleh thok, la pynlong ïa ka jingpynshisha ïa ki kandidet da u Aadhaar ha ki jaka thoh eksamin. Ki tnad Sorkar ki la ai ka jingkyrshan kaba pura sha ka jingpynlong ïa ka eksamin kaba shngaiñ bad kaba ïaid beit ïaid ryntih.
Katba la pyndep ïa ka eksamin na ka bynta bun ki kandidet ha ka ri baroh kawei, ka jingthut ha ki kor ki bor kaba ym shym la khmih lynti ka la jia ha ki iON Digital Zone iDZ Sitapura Centres, Jaipur, Rajasthan (TC Nos. 41682 and 41683), ha kaba ym shym la lah ban pyndep ïa ka eksamin na ka bynta 2,445 ngut ki kandidet namar ki jingthut ha ka bording ha ki Test Centre, namar jong ka M/s TCS Ltd., ka tnat ba pynlong ïa ka eksamin.
Ka NBEMS ka la pynpaw ka jingsngewsih halor ka jingeh kaba la mih na ka bynta ki kandidet kiba shah ktah. Ban pynthikna ba baroh ki kandidet kiba shah ktah kin ïoh ïa ka lad kaba ïahap bad kaba ryntih ban ïakhun ha ka NEET-PG 2026 bad yn pynlong ïa ka eksamin na ka bynta kine ki 2,445 ngut ha ka 05 tarik Nailur 2026 (Sngi Saitjaiñ) ha ka por 03:00 Janmiet ha Jaipur, Rajasthan.
Ka jingpynïaid kaba jop ïa ka eksamin ha kylleng ki 1,111 tylli ki Centre ha 339 tylli ki nongbah ka pyni ïa ka jingïatreilang kaba jylliew hapdeng ki bor pynïaid eksamin, ki jaka ai jingsumar, ki nonghikai, ki kynhun pahara, ki kynhun ba ïa dei bad ka teknoloji bad kiwei-kiwei kiba don bynta ha kane ka kam ha ka ri baroh kawei.
Ka NBEMS ka ai khublei ïa ka jingïatreilang, ka jingïai shah bad ka jingshaniah jong ki kandidet bad ka ai khublei ïa ki sienjam jong baroh ki briew bad ki jaka pule kiba don bynta ha ka jingpynlong ïa ka NEET-PG 2026.
