Shillong, Nailar 30
Ka Meghalaya Commercial Truck Owners & Drivers Association (MCTODA) ha ka 29 tarik Nailar, 2026, ka la pynkha sa ïa kawei ka shnat treikam kaba thymmai kaba la tip kum ka MCTODA, South-Eastern Border Area (Ranikor & Mawsynram).
Ka jingpynkha biang ka MCTODA ïa ki shnat treikam, ka long kum shi bynta ban pynbha shuh shuh ïa ka rukom treikam ki nongniah trok ha ka Jylla.
Ha katei ka sngi, la wan ban ïashim bynta lang da ki nongïalam ka MCTODA CEC, ba kynthup ïa u Bah Peter Marbaniang, General Secretary, u Bah Dwatsting Ryngtathiang, President ka Eastern West, ha ryngkat ki nongïalam ba ha khmat ka East Khasi Hills.
Ki nongkitkam ba thymmai katei ka shnat treikam ki kynthup ïa u Bah Romie Lartang kum u President, u Bah Mikestar Lyngdoh, General Secretary, Bah Pynshngainlang Marwein, Vice President, Bah Philander Thongni, Finance Secretary nalor 12 ngut ki dkhot.
Haba kren sha ki lad pathai khubor, ki nongïalam ki la ong ba ka jingpynkha ïa ka shnat treikam sa ha South Eastern Border, ka long ban peit ïa ka khia ka shon, ka kit ka bah ïa ki nongniah trok jong ka thaiñ.
“Ngi ïohi ba ki samla ki duna bha ha ka ïoh kam ïoh jam, kumta ngi khot bad wer ïa ki ban wan rung lang sha ka seng MCTODA, khnang ban kiew na kawei ka kyrdan sha kawei pat ka kyrdan,” ki la ong.
