Shillong, Nailar 30
Ka Sorkar Meghalaya haduh mynta kam pat phah ne aiti ïa ki ‘Utilisation Certificates’ na ka bynta ka pisa kaba kot sha ka T.5,428.54 klur jong ki grants-in-aid haduh ka 31 tarik u Lber, 2025, ha kaba tang ka tnad C&RD ka don palat shiteng na ka jingsahteng, la pynpaw ka kaiphod CAG.
Ka kaiphod halor ka State Finances na ka bynta u snem 2024-25, kaba la wanrah da u Myntri Rangbah ka Jylla Conrad K Sangma ha ka sngi Thohdieng, ka la ong ba ka jylla ka don T.9,157.80 klur ki UC kiba dei ban siew hapoh u snem – T.4,835.93 klur la shim na ki snem ba la dep ryngkat bad T.4,321.87 klur ka grant kaba dei ban siew ha u snem 2024-25 na ka bynta ka grants ba la sei ha u snem 2023-24.
Nalor kane, tang 532 tylli ki UC kiba shongdor T.3,729.26 klur la pynkhuid, kaba sah sa 777 tylli ki UC kiba shongdor T.5,428.54 klur kiba dang sahteng.
Ka jingsahkut kaba rim tam ka dei naduh shwa u snem 2019-20 – 51 tylli ki UC kiba kynthup ïa ka pisa kaba T.532.35 klur. Ka jingbun eh, 408 tylli ki UC kiba shongdor T.2,939.35 klur, ki dei tang ha u snem 2023-24.
Kiba dang sah ki kynthup ïa ki 95 tylli ki UC kiba kot sha ka T.2,124.37 klur hapoh ki Central Sponsored Scheme.
U CAG u la pynpaw ba ka tnad Community and Rural Development (C&RD) ka don hakhmat eh ha ka thup jong ka pisa kaba dang sahteng haduh 3,046.71 klur tyngka, kaba long 56.12 percent na ka jingkhein baroh. Kaba bud sa ka tnad ka koit ka khiah (958.90 klur, 17.66 per cent), ka tnad bording (520.09 klur, 9.58 per cent), ka Planning, Investment Promotion & Sustainable Development (216.45 klur) bad ka tnad Social Welfare (202.60 klur).
Da kaba kdew ïa ka Meghalaya Financial Rules, u auditor u la ong ba ki ophisar jong ki tnad ki don ka jingkitkhlieh ban pynshisha ïa ka jingpyndonkam hapoh shisnem hadien ba la ai jingbit.
Ka jingpynslem kaba bteng, ka la ong, ka pyni ïa ka “jingbym don ka jingpynïaid hapoh” bad ka “jinglong jong ka Sorkar ban ai ïa ki jingïarap ba thymmai khlem da pynthikna ïa ka jingpyndonkam hok ïa ki jingïarap ba mynshuwa.”
U CAG u la maham ba khlem ki UC, ym lah ban kheiñ ïa ka jingpynlut kum kaba kut bad ba “ka jingbym aiti ïa ki UC ka dap da ka jingma jong ka jingpyndonkam bakla.”
Ka la ai jingmut ba ka Sorkar kan pynngat ïa ki ophisar ha ka jingkitkhlieh, ban ai ïa ki jingbthah kiba pyrkhing ban aiti ha ka por kaba biang sha ka tnad pla tyngka bad sha u Principal Accountant General, bad ban pynïadei ïa ki jingpynmih grant ba kham bniah bad ka jingaiti ïa ki UC kiba dang sahteng.
