Shillong, Nailar 30
U MP ka NPP sha Rajya Sabha, u James K. Sangma ha ka Sngi Saitjaiñ u la ong ba ka Punjab National Bank (PNB) ka la kular ban pynbeit ïa ka jingeh kaba la slem halor ka jingkyntait ban ai ram shna ïing, ram buh bynda bad ram ha ka liang ka rep ka riang sha ki ‘riewlum ha ki jaka ba hapoh hapoh ka Khyrnit ba 6 jong ka Jylla hapoh 60 sngi.
Ha ka kyrwoh khubor, u Sangma u la ong ba ma u lem bad u Chief Secretary, u Dr. Shakeel P. Ahammed bad u Secretary (Law), u Bah Cyril V. Diengdoh ki la ïakynduh ïa ki bor pynïaid ka PNB ba la mihkhmat da u Executive Director (HR) u D. Surendran, Zonal Head (GM), Circle Head (DGM) bad kiwei-kiwei ki heh ophisar na ka ophis ka PNB ha Guwahati bad PNB Meghalaya.
“Ngi la rah ïa ka mat halor ka jingkyntait kaba la slem bah ban ai ram shna ïing, ram buh bynda bad ram ba ïadei bad ka rep ka riang kaba ktah ïa ki ‘riewlum jong ngi ha ki jaka ba hap hapoh ka Khyrnit ba 6 jong ka Meghalaya,” la ong u Sangma.
U la ong ruh ba la pynbor ïa ka PNB ban pynjynsur ïa ki kyndon ai ram hapoh jong ka, kumba long lem kiwei ki ‘Public Sector Bank’ kiba treikam ha ka Jylla.
“Ka PNB ka la ai ka jingkular kaba manbha ban pynbeit ïa kane hapoh 60 sngi ne kham kloi ïa kata, khnang ba ki longïing ‘riewlum jong ngi ha kaba kut kin ïoh ïa ka jingïoh bynta lang ka bym shah liang bad kaba ïaryngkat haba ïadei bad ki ram,” u la ong.
U Sangma u la bynrap ba kane ka kam ka la sahteng ha kine ki 18 bnai bad pynpaw ka jingkyrmen ba ka PNB kan burom ïa ka jingkular jong ka hapoh ka por kaba la buh.
