Watla ka ilekshon sha ka ïingdorbar thawaiñ ka Meghalaya ka dang sah sa kumba shisnem shiteng tam eiei, hynrei ka khubor ha kine ki sngi ka la her bha hana ba kita ki khyndait ngut ki MLA ka United Democratic Party (UDP) ki la khreh ban leit ryngkat bad pynïasoh noh bad ka Bharatiya Janata Party (BJP). Hato haduh katno ka long kaba shisha ne kaba lah ban dei tang ka jingpynphriang khubor jongno re jongno ban myntoi ïano re ïano. Tangba ha ka rynsan politik, ngi tip bad sngewthuh ba kane ka kam ban tan ne khot ne ïakren da ki nongïalam jong kawei ka seng saiñpyrthei bad kito ki nongmihkhmat jong kiwei pat ki seng saiñpyrthei ka long beit kaba natural ne kaba ju long bad don beit. Kano kano ka seng saiñpyrthei kan ïaleh beit ban khroh ne tan shalade ïa ki nongmihkhmat jong kiwei pat ki seng saiñpyrthei ym tang ba kan myntoi hynrei ruh ba kan lah ban pynpaw ïa ka jingkhlaiñ jong ka sha u paidbah khamtam lei kum kine kiei kiei ki ju jia bha ha ki por haba la jan ki ilekshon, la ka dei ka ilekshon MP, MLA ne MDC. Kum kine ki jingjia, kim dei kiba jia tang hapoh Meghalaya hynrei ha kylleng ki jylla jong ka ri bad wat sha kiwei ki ri jong ka pyrthei.
Kumba ka paw mynta hapoh ka Jylla, ka khubor ka la her sted ba kita ki khyndai ngut ki MLA ka UDP ki lah ban leit ïasoh bad ka BJP. Ka jingher sted jong kane ka khubor, ka la long ruh hadien ba ki MLA ka UDP ki la ïakynduh bad shondur ryngkat bad u Amit Shah, Myntri ka tnad Kam Pohïing ka Sorkar India, uba dei ruh u nongïalam ka BJP, haba ki la leit ban rah shikhung ki mat ba kynthup ruh ka jingïakren halor ka mat FCRA kaba la dei kawei na ki mat kaba la ïakren bha hapoh ka jylla. Kane ka dur kaba la mih ka la pynsaphriang pat ïa ka khubor ba hana imat ka la don ka jingïakren ruh halor ka jingthmu pynïasoh BJP jong kine ki MLA ka UDP. Watla ym pat lah satia ban pynshisha la ka dei kaba shisha ne em hynrei ka por hi kan sa batai.
Ka ilekshon MP shiteng samoi ka ban sa long shen, kan long kawei na ki jingtynjuh kaba khraw ïa ka UDP kata hadien ka jingsaphriang kum kine ki khubor. Hato kum kine ki khubor, kin nang pynkhlaiñ shuh shuh ne pynstait ïa ka UDP bad ïa kane ruh yn sa lah ban tip tad ynda la dei ka por. Kumba ngi la sakhi ha kaba ïadei bad ka Congress, kaba la ju long teng kawei na ki seng saiñpyrthei kaba khlaiñ bha hapoh ka Jylla Meghalaya ha ki snem kiba la leit, hynrei kumba ka long mynta, kane ka seng ka la hiar jrain bad mynta lei kam don shuh wat tang uwei ruh u MLA hapoh ka ïingdorbar thawaiñ ka Jylla, lait noh tang u MP na rilum Garo. Kumta ngim lah ban tip ne batai lypa ba kata ka seng saiñpyrthei kaba khlaiñ bor kan neh shirta hynrei ka por ïa kiei kiei baroh ka don beit. Kumta kam long satia ban shu shim ne kheiñ sting haba dang khlaiñ namar phim tip ha kano ma kano ka por phi lah ban hap jrain.
Nangne shakhmat, ngin hap ban shu ïa ap bad peit kaei ka ban jia ha ka saiñ hima sima jong ka Meghalaya khamtam ynda kata ka khubor thmu pynïasoh BJP ki MLA UDP kan pyni rong ne em, bad kaei pat ka ban jia ïa ka UDP kaba dei ruh kawei na ki seng riewlum kaba la rim bad kaba dei ruh ka seng kaba khlaiñ bor bad kaba la pynmih ruh ïa ki nongïalam ba radbah ka Jylla.
