Shillong, Nailar 30
Saw ngut ki runar kieng atiar kiba la kynnoh thmu ban rahbor ïa ki ophisar ka NHIDCL na ka bynta ban dawa pisa ki la kyllon ïap ha ka jingïather kuli bad ki bor pulit ha Songsak, East Garo Hills ha ka step Sngi U Blei.
U SP ka East Garo Hills, u Pawar Swapnil Vasantrao u la ïathuh ba la sdang ïa ka jingkhynra hadien ka jingïoh jingtip kaba tikna shaphang ka leit ka wan jong ki runar kieng atiar sha Songsak.
Ka kynhun ba ïatreilang jong ka ‘Anti-Terror Squad’, ki pulit ka distrik bad ki pulit ka Songsak ki la pynïeng ïa ka naka ha Songsak Reserve, ha shi lynter ka surok Dagal-Songsak. Ha ka por kumba 4 baje eiei mynstep, kawei ka kali ‘Bolero’ kaba don ïa u nombor AS-01-FD-2889 ka la wan sha katei ka jaka. Haba la ai dak ban sangeh, ki briew ba shong hapoh jong ka, ki la sdang ban siat ïa ka kynhun pulit.
Ki pulit kum ka jingïada ïalade, ki la pynphai kuli kylla bad kane ka la ïalam sha ka jingïather kuli kaba shipor ha kaba ka kali pulit ruh ka la shah pynjulor ha ki kuli, ong u SP.
Hadien ba ka jingïasiat ka la sangeh, ki pulit ki la lap ïa 4 ngut ki briew kiba la mynsaw jur hapoh katei ka kali. La pynkit noh ïa ki sha Songsak PHC bad hadien kata, la phah noh sha Williamnagar Civil Hospital, ha kaba ki doktor ki la pynbna ïap hashuwa ban poi ha ka jaka sumar.
Kiba ïap ki dei kiba la tip kyrteng kum u Allason Marak na Mendima, North Garo Hills, uba ki pulit ki la ïathuh ba u dei u nongshah kynnoh ba hakhmat eh ha ka jingïasiat ba dang shen ha Damra, ha kaba uwei u nongkhaïi u la shah siat.
Ki 3 ngut kiwei pat ki dei ki nongshong shnong jong ka Goalpara, Assam – u Sustom Rabha, u Kalam Ali bad u Bobidul Islam.
Ki pulit ki la ïathuh ba u Rabha u dei uba don ïa ki mukotduma kiba la pynngat pyrshah ïa u ha Dudhnoi, Mendipathar bad Dadenggre halor ki kam lute, rahbor, bad ki jingpynkheiñ ïa ka ‘Arms Act’, katba u Kalam Ali pat u dei uba la shah thwet na ka bynta ka mukotduma Krishnai kaba ïadei bad ka kam rahbor bad dawa pisa.
Na kitei ki runar, ki pulit ki la kurup noh ïa 2 tylli ki ‘pistol’ (factory-made), kawei ka don ïa ka dak ‘Beretta’ bad kawei pat ka don ki dak ki bym lah ban ithuh, ryngkat ki tiar siat, ki kuli ba dang im bad ba la bthei, kiba la pyndonkam ha ka ban thombor ïa ki pulit.
Shuh shuh u SP u la ong ba ka jingtohkit bad ki kyndon aiñ ki dang ïaid shakhmat bad dang bishar bniah ïa ki jinglong-jingman jong ka jingïasiat bad la pynlong ruh ïa ka jingpeit bniah halor ki tiar kiba la lap.
U la kyrpad ïa ki paidbah ba kim dei ban ngop ha ki jingtip ki bym pat lah ban pynshisha bad ban kiar na kaba pynphriang ïa ki khubor hamsaïa, da kaba pynpaw ba ki pulit ka Meghalaya ki ïai bteng ban ïeng skhem ha ryngkat ka jingkut jingmut ban ai jingshngaiñ ïa ki paidbah bad ban ïada ruh ïa ki nongtrei ba kongsan ha ki kam tei jingtei ha ka distrik.
