Shillong, Nailar 30
Ki nongïalam ka Khasi Students Union (KSU), kiba la shah ïalam tian bishar hynnin ka sngi ha ka Iingbishar ki la lah ban ïoh jamin noh.
Ïa ka jamin ïa kine ki nongïalam ka KSU, kiba kynthup naduh u President, General Secretary, Vice President bad sa u wei u dkhot, ki la ïoh jamin na ka Iingkashari jong ka nongbishar I. Mairom ha ka janmiet jong ka 29 tarik Nailar, 2026.
Hynrei ka jingïoh jamin ka jong ki, kam shym la pynurlong pat ïa ka jongpan jamin ki muktiar ka KSU namar katkum ka tyllong khubor, la ïathuh ba mar ïa ïoh jamin na kiwei ki mukotduma, ki la shah kem biang ha kaba ïadei bad ka mukotduma jong ka jingshah pynjulor ki kali Sorkar ha Mawlai.
Ka tyllong khubor ka ïathuh, ba ïa kine ki nongïalam ka KSU, yn sa rah tian bishar biang ha ka 31 tarik Nailar, 2026, kata ha ka sngi Nyngkong, kaba ki Muktiar ki lah ban pan ïa ka jamin.
Lah ban kdew, ba ka jingshah kem noh ki nongïalam ka KSU, kadei hadien ba la jia ka jingmih ka huri hura ha ka por ba ka KSU ka pynlong ïa ka rally arshaka ha Nongbah Shillong, ban pynsngew ïa ki mat jingdawa sha ka Sorkar Jylla, hynrei ka la mih pat ka jinghuri hura, kaba la shah pynpait ki kali ba na Assam, ka jingshah thang ki kali Sorkar, bad ka jingshah shoh pynmynsaw ki briew ha ki briew ba shim kabu.
