Shillong, Nailar 31
U President ka United Democratic Party (UDP) Bah Metbah Lyngdoh ha ka sngi Nyngkong u la ong ba baroh 12 ngut ki MLA ka seng ki dang long tylli kawei ha Jylla bad kyntait ïa ki khubor ban don ka jingkyntiap seng jong kiba bun ki MLA sha ka BJP.
“Kam don satia kano-kano ka kynrum kynram ha ka UDP kat haduh mynta. Nga la ïakren bad baroh ki MLA, ym lyngba kiwei pat, bad ym don uwei ruh na ki ba ong ba kin leit ïasoh BJP. Nga ïoh sngew ïa kane tang ha ki lad pathai khubor,” ong u Bah Metbah bad bynrap ba ki jingïakren ba khyndai ngut ki MLA kin leit ïasoh BJP ka dei tang ka jingmutdur hi.
“Ki jingmutdur kin ïai neh tang kum ka jingmutdur. Ngan ïathuh haphi tang ïa kaei kaba jia,” u la ong.
Halor ka khubor ba ki MLA ka UDP kila hiar kyrkieh sha Delhi ha kine ki arsngi bala leit, u Bah Metbah u la ong, “Kane ka long kaba sngewsih bad ka bym dei satia. Nga don ha Shillong baroh shi taiew. Nga leit sha Delhi tang ha ka sngi Nyngkong jong ka taiew bala lah na ka bynta ki prokram Sorkar. Ki khubor ki ong ba nga la donlang ha Delhi bad ki MLA ha kine ki ar sngi, ka dei kaba bakla”.
U ïathuh ba ka jingleit Delhi dang shen ka dei namar ka FCRA. “Khyndai ngut ki MLA kila ïakynduh ïa u Amit Shah, Myntri kam Pohïing halor ka FCRA Amendment ha Parliament,” u la ong.
Halor ka khubor ba ki MLA ki sah ha Guwahati bad Kolkata, u la pynshai, “Saw ngut ki MLA kata u Bah Renikton, Pius Marwein, Balajied Synrem, Kyrmen Shylla bad Synshar Lyngdoh kila leit sha Kolkata ha ka janmiet sngi Thohdieg namar ki kam shimet ym ka kam saiñpyrthei”.
“Kiwei pat ki MLA ki don lut ha Shillong. U MLA ka Mawphlang Bah Beyondstar Kurbah u don ha Shillong, u MLA ka Mawsynram Olan Sing Suin u don ha ophis ha Shillong, u Bah Lahkmen Rymbui u don ha Shillong. Kumta, ka khubor ba ki ïa hiar sha Guwhati ban ïakynduh ïa ki nongïalam ka BJP ban ïapynbeit khatduh ïa ka jingïasoh ka dei kaba bakla bad ka bym donkam” u la bynrap.
U Bah Metbah u la ong ba kam shym la don satia kano-kano ka jingbym sngewtynnad halor ka jinglong nongïalam jong u. “Nga la ïakynduh ïa baroh ki MLA bad kylli ïa ki. Ym don mano mano ba pynpaw ïa ka jingbym sngewhun ïa ka jinglong nongïalam jong nga. Ki ïakmen lut baroh haduh mynta,” u la ong.
U la kyntu ïa ki lad pathai khubor ban da pynshisha. “Sngewbha pynshisha hashuwa ban shna ïa kano kano ka khubor, lym kumta kan phah ïa ka khubor kaba bakla sha ki paidbah,” u la ong.
Haba kylli ba ka don kano-kano ka jingpyrshang ban wanrah ïashrut hadien ka jingshah kynthup jong u ha ka thup Myntri bad weng noh ïa u Bah Paul Lyngdoh bad Bah Kyrmen Shylla, u Bah Metbah u la ong, “Kam don eiei satia kum kata. Kaei kaei ka rai kaba la shim, ka dei kaba la shim hapoh ka seng da ka jingïatip lang jong baroh lang, kiba dei ki bynta jong ka seng.”
