Shillong, Nailar 31
Ka Khasi Students’ Union (KSU) Rynjah Lapalang Unit ha ryngkat ka Seng Samla ki la ïoh bat san ngut ki bar Jylla kiba leh thok pisa ban siew ‘Online’ ha ki ba bun ki dukan jong ka thaiñ Rynjah.
La ong ba ïa kine ki jait kam ban leh thok haba siew jingsiew ka jur bha ha ka thaiñ, ha kaba kitei ki briew ki pyndonkam da ka App kaba ki lah ban thoh kano-kano ka dor ban pyni ba ki la dep siew katba ka pisa kam poi sha ki briew kiba die jingdie.
Haba kren halor kane u samla Richmark Lamin President jong ka KSU Rynjah Lapalang Unit, u la ïathuh ba kine ki briew ki don da ka kynhun ha kaba ki la ju leh ïa kane ka kam mynta da bun bnai bad katkum ka jingïathuh kiba shong dukan ha kitei ki thaiñ bad kiba la ujor sha ka seng, kine ki briew ki la bam pisa palat 2 lak tyngka.
U la ong haba ïadei kane ka jingïoh ban bat ïa kine ki briew ka KSU ka la khot ïakren ïa ki kmie ki kpa jong kitei ki briew bad nangne shakhmat kan dang bteng ban pynlong ïa ka jingtohkit ban lap shuh-shuh ïa kiba donkti haba ïadei kane ka kam, u la kyntu ïa ki paidbah khamtam ïa kiba shong dukan ha kitei ki thaiñ ba kin long kiba husiar na kine ki briew.
Uwei na ki nongshong dukan ha ka thaiñ u la ïathuh ba kine ki briew ki la ju wan bunsien ha ka dukan jong u ban thied jingthied da kane ka rukom leh thok, hynrei ha ka jingbunkam u la ong ba um poi pyrkhat ba kin leh thok ha ka rukom siew katba u lap ba kine ki briew ki la thok bunsien bha ïa u.
U la ong ba ki kam sniew kam thok kam shukor ki la nang jur ha kine ki sngi, u la pynpaw ba kane ka kam thok jong kine ki briew ka dei ban kut noh bad namar kata u la pyntip ïa kane ka jingjia sha ka KSU kumjuh ka Seng Samla bad u la kyntu ruh ïa ka tnad Sorkar ba dei peit ïa kum kine ki kam, ba ka dei ban shimkhia ban pynduhjait ïa kine ki jait kam.
