Shillong, Nailar 31
Katba dangmih ki sngi ka jingjyllei ki nongkhaïi bad nongdih drok ha ka Jylla, ka la shyrkhei haduh katta katta, kaba ki briew kim kheiñ shuh wat ban injek drok ha ki surok, ki lynti syngkien ba ïaid ki paidbah.
Ym tang ka jingshlur ban injek drok ha ki jaka paidbah, hynrei la ïohi ruh na ka por sha ka por, ba ki briew ba pyndonkam ïa u drok, ki ju thiah lyngktar ha ki surok katba lap, katba shem.
Ïa kane ngi lah ban sakhi, ba la don ki briew kiba dei ki bar jylla, kiba thiah lyngktar ha surok man ka miet kaba dei surok ha Jail Road, kiba dei ruh ki nongkhaïi bad ki nongdih drok.
Ha ka jingleit khynra ka Hynñiewtrep National Youth Front (HNYF) ha ka step phyrngap jong ka 31 tarik u Nailar 2026, kine ki bar jylla ba ju thiah ha kitei ki surok, ki don palat 5 ngut hynrei ki la don pat kiba la lait phet noh mar shu wan khynra ka seng.
La ong ruh, ba kine ki briew ki ju byrngem ban dung da ka tari ïa ki briew kiba thmu ban beh ïa ki na katei ka jaka.
Hadien ba la ïoh jingtip ïa kane, na ka liang ki dkhot ka Hynñiewtrep National Youth Front (HNYF) hapoh ka jingïalam u Bah Jeff Sohtun, ki la leit mar-mar sha katei ka jaka ha ka por 2 baje mynstep phyrngap, ban leit beh krad ïa kitei ki briew ba thiah ha katei ka jaka.
Haba kren sha ki lad pathai khubor u Bah Jeff Sohtun u la ong ba kine ki briew bar jylla kim shym la don ki kot ki sla kiba biang.
U la buh jingkylli ruh ba hato ka shnong ka shah seh ba kine ki briew ki shu wan sah ha kane ka jaka, bad lada jia kaei-kaei, mano ban shim ïa ka jingkit khlieh.
Kumta u la kyntu ïa baroh ki paidbah ba kin shimkhia ban nym shah lada ïohi ba ki briew ba nabar kin sah bad thiah ha ki surok, ki lynti ki syngkien.
