Shillong, Nailar 31
U nongïalam ba rangbah ka BJP uba dei ruh u MLA ka Pynthorum-khrah, u Bah Alexander Laloo Hek ha ka Lah Sngi U Blei u la ong ba kano-kano ka rai halor ka jinglah ban pynïasoh ki 9 na ki 12 ngut ki MLA ka UDP bad katto-katne ngut ki nongmihkhmat ka TMC sha ka BJP yn shim da ki nongïalam ba halor jong ka seng.
U Bah Hek u la jubab halor ki khubor kiba la mih ba kumba 9 ngut ki nongmihkhmat ka UDP bad katto-katne ngut ki MLA ka TMC kin sa leit ban pynïasoh noh sha ka BJP ha kine ki sngi ban wan.
“Ka jingkhang jong ka BJP ka plie ïa uno-uno u ban pynïasoh sha ka BJP. Ngi kyrmen ba ka Sorkar ha u 2028, kan dei kaba ïalam da ka BJP ha Meghalaya,” la ong u Bah Hek.
Hynrei u la ban jur ba ka seng hapoh ka Jylla kam don bor ban rai halor kiba kum kine ki jingpynïasoh.
“Na ka bynta kata ka jait jingkylli kaba phi kylli ïa nga, tang ka BJP ha ka kyrdan jong ka ri kaba lah ban shim ïa kata ka rai. Ngi don ki Chairman, ki ‘In-charge’ ka NEDA, jong ka seng, dei kine ki ban leh ïa kaba donkam. Haba ïadei pat bad ka jingkhot sngewbha ïa kano-kano ka seng saiñ pyrthei ne nongïalam, ka rai kaba khatduh ka dei na ki nongïalam ba hakhlieh jong ka BJP,” la ong u Bah Hek.
Na ka liang une u nongïalam, u la kubur ba ki jingïalang ki la don hashuwa, hynrei u la ong ba haba ïadei bad kane ka kam kaba mynta, kane ka shong beit na Delhi.
“Hooid, hashuwa ki la don ki jingïalang hynrei na ka bynta kane ka mat kaba mynta, ka dei beit ka rai na ki nongïalam ba halor jong ka seng. Baroh ki rai, baroh ki jingtreikam ka dei na ki nongïalam napoh Delhi. Kane kam dei ka rai jong ka BJP napoh ka Jylla,” u la ong.
Haba kylli la hato ki MLA ki la kynjoh mo sha ka State-BJP, u Bah Hek u la ban biang, “Ka dei na ki nongïalam na Delhi bad kata ka rai ka shong ha ki. Ka dei ka rai jong ki nongïalam ba halor jong ka BJP. Ïa ka rai yn shim tang da ki nongïalam ha ka kyrdan ba halor jong ka ri.”
Halor ka jingïasngewthuh jingmut hapdeng ki seng ba ïatehlok hapoh ka MDA, u Bah Hek u la ong ba um don hok ban kren eiei shaphang kiwei pat ki seng.
“Ngi sngewthuh ïa kata, ngam lah ban ong eiei halor kata. Ka dei ka jingsngewthuh jong ki seng saiñ pyrthei kiba don ryngkat lang bad ngi ha ka Sorkar MDA, kata ka dei ka jingsngewthuh jong ki hi. Ngi trei tang na ka bynta ka seng saiñ pyrthei lajong hynrei ban kren ïa kiwei pat ki seng saiñ pyrthei, kata ngam don hok,” u la ong.
Haba pynskhem ba ka seng ka pdiang sngewbha ïa kino-kino kiba kwah pynïasoh, u Bah Hek u la ong, “Ngi pdiang sngewbha ïa ki lada ki wan ban pynïasoh bad ngi. Ka jingkhang jong ka BJP kan ïai long kaba plie beit. Ngin leh katba lah na ka bynta ka roi ka par jong ka Jylla, na ka bynta ka koit ka khiah, ka pule-puthi jong ka Jylla.”
Halor ki jingïakynnoh ha ka saiñ pyrthei, u la ong, “Ha ka saiñ pyrthei, u ‘A’ u kynnoh ïa u ‘B’, u ‘B’ u kynnoh ïa u ‘C’, kata ka don beit. Lada ym don ka jingkynnoh te shano ka saiñ pyrthei kan poi? Ha ka saiñ pyrthei, ka jingïakynnoh ka don beit. Khlem ki jingkynnoh, ngim lah ban khot ïa ka-ka saiñ pyrthei.”
“Baroh ki kynnoh iwei-ïa-iwei, kam don jingeh hynrei ka seng jong ngi kan nang pynkhlaiñ ïalade ha ka Jylla Meghalaya ban pyntikna ba ha u snem 2028, kan dei ka Sorkar ba ïalam da ka BJP,” u la bynrap.
