Shillong, Nailar 31
Ki nongïalam ka Hynñiewtrep National Youth Movement (HNYM) Raid Rngi Circle, ha ka jingïa synranlang u Bah Louis Dohtdong, President ka HNYM CEC, ha ka 31 tarik u Nailar, 2026, ki la leit ban kynduh ïa u Bah Denzil R. Chen, EM ba dei khmih ïa ka tnad Elaka, ba un tuklar lem halor ka jingtei ïa ka 4 star hotel ha katei ka Raid.
Haba kren sha ki lad pathai khubor, u Samla Bashanskhem Umsong, Secretary ka HNYM Raid Rngi Circle, u la kynnoh ba ïa katei ka jaka Raid kaba don kumba 10 aqkar ei-ei la pynlong pynban kum ka jaka ïadie ïathied da ki riew shimet lyngba ka jingkynshoit ki rangbah shnong.
U la ong ba kum ki nongshong shnong, ki sah ha ka umdum halor katei ka projek kaba la pyntrei da ka tnad Tourism ka Sorkar Jylla.
U EM u dei ban shimkhia halor kane ka kam, namar ka jingïadie ïa thied khyndew ha ka Raid jong ngi, ka la ïaid lait na ka aiñ bad ki kyndon jong ka raid, u la ong.
“Katkum ki kyndon jong ka Raid Rngi, ka long ban nym shah ban ïa die ïa thied jaka ne ban ai pateng sha kiwei ïa ka khyndew kaba dang dei hapoh u pud u sam jong ka Raid. Kumta halor kane ka projek ha Raid Rngi kaba la ïaid shakhmat mynta ngin pyrshah beit,” la ong u Samla Bashanskhem.
U la pyntip ruh ba na ka liang u EM, u la pynthikna ban sa shimkhia ïa kane ka kam.
Namarkata, u Samla Bashanskhem u la pyntip ruh, ba ka seng kan sa pynlong ïa ka jingïalang paidbah ha ka 10 tarik u Nailur 2026, ban long ha ka shnong Iewrynghep, kum shibynta ban pynpaw ka jingpyrshah ïa ka jingwan katei ka 4 star hotel.
