Shillong, Nailar 31
U MLA ka UDP na Mawsynram Bah Olan Sing Suin, u la ñiew kum ka ‘khubor thok’ halor ka jingkam ba 9 na ki 12 ngut ki MLA ka UDP ki don jingthmu ban leit ïasoh noh sha ka Bharatiya Janata Party (BJP).
Haba kynthoh halor ki jingmih khubor ha ka sngi Nyngkong, u Bah Suin u la ong, “Ngam don jingtip eiei ïa kata. Nangno phi ïa ïoh ïa kata ka khubor? Hadien ka Dorbar Synrai, nga la leit sha shnong bad nga dang wan phai hynnin ka sngi”.
U la bynrap, ‘Lada ka kyrteng jong nga ruh ka don, balei phi kylli ïa nga?. Nga dang shu wan mynnin na Lawbah. Ka dei ka khubor thok. Phin sa duh noh ïa ka jingshaniah. Nga tharai phi ïa kwah ban ïa thaw khubor hi dalade”.
Halor ka jingïalang ba dang shen hapdeng ki MLA ka UDP bad u Myntri kam Pohïing ka Ri Amit Shah, u Bah Suin u la pynshai, “Hooid, ngi la ïakynduh ïa u Amit Shah la shi bnai mynta ban ïakren ïa ki kam ba ïadei bad ka Jylla. Hadien kane ngi la don ka Dorbar Synrai bad ngi khlem ïakynduh shuh. Hadien ka Dorbar Synrai, Nga la leit sha shnong”.
Haba batai ïa ka jingleit Delhi, u Bah Suin u la ong, “Ngi don ïa ka hok ban ïakynduh ïa ki nongïalam ka Sorkar Pdeng ha ka riti synshar paidbah. Ngim dei ban shaniah tang ha u Myntri Rangbah ka Jylla. Na ka seng, ngi don ïa ka hok ban leit bad kylli balei kine ki kam ki sahteng”.
Haba kyntait ïa ki khana khlieng tyngab ba don ka jingïashrut bad jingbym shaniah shuh ïa u President ka UDP Bah Metbah Lyngdoh, u Bah Suin u la ong, “Balei ba ngin ym shaniah shuh ïa u President?. Mano ban long President nalor u Bah Metbah?. Kane ka dei ka saiñpyrthei, ki jingantad kan mih beit, hynrei shimet hi nga don ha ka jingshaniah ba pura ha u. Ngam ïohi ban dang don kiba kham tbit ban ïa u ban ïalam ïa ka seng”.
“Ka don tang kawei ka kynhun ha ka UDP, ba ïalam da u Bah Metbah Lyngdoh. Ngam tip ïa kano-kano ka kynhun thymmai. Mano ba ïalam ïa kane ka kynhun, hato dei u Bah Olan Sing Suin,” u la buh jingkylli.
