Mawkyrwat, Nailar 31
Kawei ka metïap shynrang briew kaba ym pat lah ban tip ïa ka rta bad ka kyrteng, la lap ha kawei ka wah ha Phodpynton kaba hap hapoh ka shnong Mawranglang Lai Kyntoit, South West Khasi Hills District.
Katkum ka tyllong khubor na u Bah B. Jyrwa, Superintendent of Police ka South West Khasi Hills District u la ong ba ïa katei ka metïap la lap ha ka janmiet jong ka 29 tarik u Nailar 2026 ha ka por kumba 6:10 eiei.
Shuh shuh u Bah B. Jyrwa u la ïathuh ba katei ka metïap kaba la pyut ka la sahkut ha ki maw bad utei u briew uba ïap u phong ïa ka sopti rong ïong.
La lap ruh ïa u jingdeng kti (Taweez) kaba la teh da u tyllai ha ka kti kamon kaba shaneng.
Ki khubor na u SP, la ïathuh ruh ba katei ka metïap ka la pyut bha bad la sakhi ïa ki dak jong ka jingkylla rong ha ka met, ryngkat bad ka jingdon jong ki khñiang.
Namar ba ka metïap ka la pyut bha ïa ka daw jong ka jingïap haduh mynta ym shym la lah ban tip, ïa katei ka metïap la rah noh sha Civil Hospital Shillong na ka bynta ban leh ïa ka Post-Mortem.
