Shillong, Nailar 31
U Bah Vincent H Pala uba dei u kyrtong ka Congress u la sdang ïa ka jingïalap ilekshon MP shiteng samoi na ka shnong Lamarshiang ka shnong kaba u la heh la san.
Ha kane ka sngi ki nongïalam Congress ki la hiar ban synran ïa u Bah Vincent Pala ban pan jingkyrshan na ki paidbah haba un ïakhun biang ïa kane ka ilekshon MP Lok Sabha.
Haba kren ha kane ka jingïalang u la ong kham mynshwa ki MP kim ju ïakren ïa ka ktien Khasi hynrei u phadar Sngi Lyngdoh uba la khot ïa u ban ïakren ba lada im ka ktien im ka jaidbynriew.
U la ong ba ha Parliament u la kren bunsien ïa ka ktien Khasi hynrei kiwei ki MP ruh ki la kren tangba kim pat lah ban kren kumba kren ma u.
U la ïathuh ba ka Congress ka dei kaba la ïakhun ruh ïa ka FCRA ban ïada ïa ki rit paid. Kumta u la khot ïa ki paidbah ban ai jingkyrshan biang mynta ïa ka congress ha kane ka ilekshon shiteng samoi.
“Ngam dei u MP tang ka congress ne Lamarsiang hynrei nga dei baroh ki shnong bad ki niam, nga shait shah kynnoh ba ka nongrim ka congress ka peit ïa kiba duk bad ki paidbah ki don jingngeit kin ïada ïa ki,” u la ong bad bynrap “Ngin sdang na kane ka shnong bad ïatylli na shnong bad na kane ka constituency.”
U la ïathuh haba ka Parliament ka la buh ban wanrah ïa ka FCRA, ki nongïalam niam ki la wan ïakynduh bad u la leit sha Delhi ban ïakynduh ïa ki paralok MP ka Congress haduh ba ka parliament ka la phah sha ka Joint Parliamentary committee.
U la ong ba lada 38 tylli ki jylla bad lada don mar shiteng kiba pyntreikam ïa kane ka ain, ka Sorkar India ka hap ban pyntreikam bad mynta ki don 13 tylli ki jylla ba synshar ka BJP.
“Ha Goa ki Khristan kiba don 38 percent ki la mynjur hynrei namar ba don ki MLA ka BJP kiba dei ki khristan la hap ban pynsangeh noh,” u la ong.
U la ïathuh ba mynta ki jylla ba la synshar da ka BJP kum ka Assam bad West Bengal ki la pynkhreh ban pyntreikam noh.
