Shillong, Nailar 31
Ki nongïasaid aiñ ka Jylla kin pynlong ïa ka jingsangeh treikam naduh ka 1tarik Nailur ban pynbor na ka bynta ban weng noh ïa u Advocate General, u Amit Kumar.
Ïa ka ‘Resolution’ haba ïadei bad kane ka bynta la mynjur da kawei ka sur ha ka jingïalang ‘Joint Executive Committee’ ba kyrkieh jong ka High Court of Meghalaya Bar Association bad ka Shillong Bar Association ha ka Lah Sngi U Blei.
Ha kajuh ka por, ïa kane ka jingïalang la pynlong ban rai haba ïadei bad ka lynti ban shim nangne shakhmat hadien ka jingïalang ‘Joint General Body Meeting’ jong baroh ki Bar Association jong ka Jylla ha ka 24 tarik u Nailar, ha kaba ki dkhot da kawei ka sur ki la rai ban buddien ïa ka jingdawa ban weng noh ïa u Kumar.
Katkum katei ka ‘Resolution’, ki Association ki la rai ba baroh ki nongsaid aiñ kiba treikam hakhmat baroh ki ïingbishar bad ki ‘Tribunal’ ha Meghalaya kin sangeh na ki kam bishar naduh ka 1tarik Nailur tad haduh ba ka Sorkar kan weng noh ïa u Kumar na ka kam Advocate General.
Ka ‘Resolution’ ka la ong ba ïa kane ka rai la shim namarba ka Sorkar Jylla kam shym la shimkhia ban ïakren bad ki Association bad ban pynbeit ïa ka jingdawa jong ki, wat hapdeng ka jingkynnoh ba ka pynsniew ïa ka burom, ka bha ka miat bad ka jingmyntoi jong ka Bar, kaba la mih na ka jingleh jong u Amit Kumar.
Ka la bynrap ba ka jingïalang ba kyrkieh (Emergent Joint Meeting) ka sngew ba kane ka dei ka lynti kaba biang ban pynbor ban pynurlong ïa ka jingdawa kaba long na ka bynta ka jingbha jong ka kynhun ki nongïasaid aiñ ka Jylla baroh kawei.
Ha kawei ka liang, ka la ong ba yn pyllait ïa ki kam bah jamin na kane ka jingsangeh treikam.
