Nongstoiñ, Nailar 31
Kawei ka dukan kaba don hajan ka kshaid Weinia, kawei na ki jaka jngohkai ha ka thaiñ Nongkhnum ha West Khasi Hills la suba ba kala shah thang dusmon ha ki briew ki bym shym la tip ki dei kiei.
Katkum ka tyllong khubor bala ïoh lum la ong ba katei ka jingjia kala jia ha ka shiteng synñia jong ka 30 tarik u Nailar 2026, bad la ong ruh ba katei ka dukan ka dei kaba ju sah briew man la ka sngi man la ka miet kaba dei ruh jong u Bah Spailin Lyngkhoi bad ka Kong Balinda Ïawren.
Shuh shuh la ïathuh ruh ba man la ka taïew ha ka sngi Saitjaiñ, ki trai jong katei ka ïing ki ju leit sha la shnong bad myn ha ka 29 tarik u Nailar 2026 ruh kitei ki shi kurim ki la mih na ka katei ka dukan ha ka por janmiet hynrei ha ka sngi ba bud jong ka sngi U Blei kaba dei ruh ka 30 tarik u Nailar, haba ki la wan phai sha la ka dukan dang step phyrngap ha ka por 5 shiteng eiei da ka jingthmu ban leit ai bam sniang, hynrei ynda la poi ha katei ka jaka ki la kyndit haba ki lap ïa la ka ïing ba ka dang ing bad ka ding ruh ka dang klang bha.
Na ka liang ki trai jong ka dukan ki la ïathuh ba katei ka jingduh noh ïa katei ka dukan, ka jingduhnong kala kot sha kumba 30 lak tyngka eiei, namar hapoh ka dukan don shibun ki tiar kiba kordor ryngkat bad ka pisa, ym tang katta hynrei ki la ong ruh ba nalor kitei ki jingdon jingem, ki runar kiba la thang dusmon ïa ka ïing ki la rah lut ruh wat ïa ki syiar kiba ki la ri.
Shuh shuh la ïathuh ruh ba ha katei ka jingjia ym shym la don kano-kano ka jingmynsaw, lait noh tang ka jingduhnong bad mynsaw jong kawei ka miaw kaba ki ju ri ha ki bynta jong ka kjat.
