Shillong, Nailar 31
Ka ‘Shillong Cherry Blossom Festival 2026’ kan sa long ha ka 20-21 tarik u Naiwieng bad naduh mynta ka kynti, ïa kane ka tamasa yn sa pynlong beit noh ha ka jaka bathymmai – ka New Shillong Highland Grounds – ha kaba ki khlur ka rwai ka siaw bad nongput-nongtem ba paw ka Amerika – u Khalid, Swae Lee bad ka ‘Boys Like Girls’ kin wan ban ïashim bynta ha kane ka tamasa.
Ki nongpynïaid ki la ïathuh ba shen yn sa pynbna sa ïa 2 ngut/tylli kiwei pat ki nongrwai/kynhun ba paw jong ka pyrthei ki ban wan ïashim bynta lang ha kane ka tamasa.
Kane ka tamasa kan kynriah noh sha New Shillong hadien ka kylla kaba jop ha u snem 2025 ha kaba la wan ban ïashim bynta da u Jason Derulo, ‘The Script’, Tyga, Diplo, Nora Fatehi bad ‘Aqua’.
Na ka liang ka Sorkar Meghalaya ka la ai ïa ka New Shillong Highland Grounds kum ka jaka ba neh na ka bynta ban pynlong ïa ki tamasa bad ki ‘Concert’ kiba heh.
Ki nongpynïaid ki la ïathuh ruh ba kane ka jaka kaba jngai kumba 30 minit eiei na nongbah Shillong kan kham pynsuk ïa ki nongwan jngohkai na Jowai, Assam bad ki Jylla ba marjan.
Ka jingkynriah sha ka jaka thymmai ka la pynslem ha ka ban pynbna ïa ka ‘Line-up’ mynta u snem namar ki jingpynkhreh kiba bniah bad kiwei-kiwei ki jingdonkam na ka bynta kine ki nongrwai ba nabar ri. Hadien ba la dep ban pynbeit ïa ka jaka, ki jingpynkhreh bad ki kam ki ïaid shaid-shaid shakhmat, la ong ki nongpynïaid.
Ha kane ka madan thymmai yn buh ruh ïa bun ki jaka rung/jaka mih, ki jaka pynïeng kali bad ka jingpynbeit ryntih haba ïadei bad ka jingpynïaid ïa ki kali. Ka Sorkar Jylla kan buh ruh ïa ka ‘Comprehensive Mobility Plan’ ban pyntikna ïa ka leit ka wan kaba suk ba saiñ ha kine ki 2 sngi jong ka tamasa.
Shuh shuh ïa ki tiket yn die ‘Live’ ha ka 4 tarik Nailur ha ka por 6 baje mynmiet tang ha ‘RockskiTickets.com’, ha kaba ki ‘pass’ ba shisngi kin sdang naduh T.2,500 kynthup ïa ki khajna.
